Durante tratamento di presupuesto 2023, Minister di Energia Glenbert Croes a elabora riba e oportunidad cu Aruba tin pa re-desaroya e zona grandi di e refineria. Minister Croes a splica cu un di e misionnan di gobierno ta pa pone e proyecto di hydrogen riba e zona di refineria como parti di diferente proyectonan cu lo bay bin.
Aruba ta desea di bira e hub di hidrogeno pa e region Caribense y pesey gobierno ta sali busca y crea condicionnan via cual lo por logra e proyectonan aki pa bin Aruba. Apesar cu e cierre di e refineria tabata tin un impacto economico grandi riba e isla, awe toch Aruba tin un zona grandi disponibel cu por ser re-desaroya.
Mirando e grandura di e zona di e refineria, gobierno lo por bin cu diferente proyectonan, manera un waf industrial, waf turistico, Eagle LNG, e “tank storage” cu ta bay ser reactiva y e proyecto di hidrogeno. Actualmente refineria tin un bida limita.
Minister Croes tambe a informa di companianan grandi cu tin interes den desaroya y inverti riba proyectonan. Companianan manera Eagle LNG na unda cu e impacto riba e economia ta visibel. Enbes di tin un compania cu tur cos, lo tin varios compania cu lo ta invertiendo den nos economia.
Un di e aspectonan fundamental pa Minister Croes ta e credibilidad di e companianan cu ta interesa pa inverti den economia di Aruba.
Plan di desaroyo di e gobierno actual pa cu e zona di e refineria ta grandi, y por tin un impacto mas grandi cu loke tabata tin anteriormente. E zona ta asina grandi cu e lo por ser desaroya pa turismo, comercio of condominio.
Gabinete Wever-Croes su mision ta, pa e desaroyo ta forma parti di e deseonan e comunidad. Un di e deseonan di San Nicolas Business Association ta pa por bin un corridor. E desaroyo di area di “downtown” tambe lo ser teni na cuenta. Mas importante ainda ta cu loke no ser usa mas lo ser haci limpi pa otro desaroyonan por tuma luga. Lo tin diferente proyecto di energia cu hunto lo representa un inversion grandi, brindando perspectiva pa futuro. Segun expertonan, ki proyecto cu bay eyriba mester opera a base di gas cu lo reduci e “carbon footprint” pa mas di 80-90% cu lo mehora calidad di bida di nos cuidadanonan.
Gabinete Wever-Croes II ta haciendo su maximo esfuerso pa traha na bienestar di pais Aruba, buscando inversionistanan pa inverti den e economia, cuidando e medio ambiente y mehora e calidad di bida pa e comunidad di Aruba.
