Den un conferencia di prensa, Minister di Energia Glenbert Croes a duna un splicacion, riba e impacto economico grandi cu e “partnership” entre Aruba y Acciona Energia, lo tin pa e economia di nos pais. Minister Croes a indica cu e MOU firma pa WEB, Utilities, RDA y ELMAR cu Acciona Energia pa realisa Aruba Hydrogen Valley, ta un paso grandi y positivo pa pais Aruba y cu Gobierno ta sumamente orguyoso di dje.

Mester remarca cu e insinuacionnan eyfo cu e compania di Eagle LNG y Acciona Energia, cu un lo elimina e otro ta completamente falso. Nan lo co-existi cu otro, na unda comunidad di Aruba lo biba den un ambiente economico unda tur dos ta bay ta disponibel pa nos comunidad, economia y pa exportacion.

Minister Croes a indica di ta contento cu Gobierno a logra yega na un acuerdo cu Acciona Energia cu ta e prome operador na mundo dedica exclusivamente na energia renobabel. Un compania grandi y renombra, cu tin mas di 45 mil empleado, un entrada di mas di 20 biyon Euro, y 29 aña di experiencia. Tambe, e compania tin un presencia global na mas di 10 diferente pais rond mundo, entre otro Merca, Canada, India, Chile, Portugal, y proximamente na Aruba. E acuerdo entre Aruba y Acciona Energia ta mustra cu nos ta comprometi cu decarbonisa.

Aruba como isla den Caribe y cu un solo fuerte ta e pais ideal pa e proyecto di e Green Hydrogen Valley. E green hydrogen lo cumpli cu e normanan di EU y lo ta competitivo den costo, mirando cu Aruba ta den e top 5 paisnan na mundo ideal pa genera electricidad a base biento y solo. Tambe e ubicacion di e isla ta un bentaha, mirando cu e ta accesibel pa bende y produci e green hydrogen. E “business model” pa e green hyrdogen bira un otro pilar economico a base di exportacion, lo tin un impacto grandi pa pais Aruba.

Minister Croes a indica cu e proyecto aki ta nobo pa Aruba, pero ta kere cu na momento cu un oportunidad wordo identifica pa bo pais, bo mester bras’e y realise’. Pesey mirando e oportunidad grandi aki, Aruba a busca conseheronan internacional pa guia nos den e direccion corecto pa por realisa e proyecto aki.

E Aruba Hydrogen Valley lo bay genera empleo, y door di exportacion, e impacto ta bay ta hopi mas grandi cu loke nos economia local lo por consumi, e entradanan pa pais Aruba lo ta impactante, contribuyendo na un nivel di prosperidad mas grandi. Como pais chikito, Aruba lo produci gas natural y hidrogeno.

“Mi ta acredita Prome Minister Evelyn Wever-Croes pa como Minister di Energia, pa a bin cu e National Energy Policy. Tambe mi ta admira e pasion di coleganan di coalicion riba e tema di hydrogeno. Y pami como Minister di Energia actualmente, e ta un honor di por ta e acelerador den haci e visionnan aki bira realidad” Minister Croes a expresa.