Continuando cu e esfuerso di Gobierno di Aruba pa baha e prijs di awa y coriente, Minister Glenbert Croes a reuni cu e directornan di e companianan estatal, Utilities, Web y Elmar pa continua cu e plan pa baha e tarifa di awa y coriente.

Minister Croes a splica cu e plan ta den proceso y unabes e ta cla, gobierno lo aprob’e pa asina, kisas na un forma gradual, cuminsa baha e prijs di awa y coriente. Gobierno di Aruba naturalmente lo tene cuenta cu e recuperacion di e companianan estatal, pero semper lo tin como prioridad e bienestar di Aruba su comunidad.

“Nos tur ta bringando pa e mesun causa: Alivia e bida pa tur famia na Aruba, pa henter e pueblo trahado, pa henter nos Pais. Esaki SEMPER ta nos PRIORIDAD.”, e mandatario a declara referente e reunion cu e companianan estatal pa baha prijs di awa y coriente.

Tambe e mandatario a reitera e importancia di e acuerdo cu Aruba lo kier cera directamente entre Refineria di Aruba (RDA), Fuel Marketing Supply Aruba (FMSA) y PetroEcuador pa haya combustibel segun e specificacion- y exigencianan di WEB pero na un prijs hopi mas beneficioso cu e ta awo. Si Gobierno logra cera e acuerdo aki, esaki lo conduci cu lo por baha prijs di awa y coriente substancialmente y asina drecha e situacion di bida pa e comunidad di Aruba.

“Pesey, como Minister di Energia, mi lo sigui persisti pa e acuerdo aki wordo cera lo mas pronto posibel”, Minister Croes a expresa.

Como Minister di Energia e ta reafirmana comunidad en general cu proximamente e tarifa di awa y coriente lo baha y cu su persona y e directornan di e companianan estatal ta trahando duro pa haci esaki un realidad lo mas pronto cu ta posibel.

Director di utilities Sr. Anthony Rojer tambe a comenta den un comunicado cu ta trahando continuamente pa ofrece un miho tarifa di awa y coriente na comunidad. Den e comunicado a informa cu diahuebs mainta tabatin un reunion hopi interesante cu Minister di Energia Sr. Glenbert Croes riba e topico reduccion di tarifa di awa y coriente.

Den e reunion tambe tabata presente Director di WEB Aruba nv. Sr. Alfredo Koolman, Director di ELMAR nv. Sr. Anthony Irausquin como tambe Director di Utilities Sr. Anthony Rojer. Den un declaracion di Sr. Rojer despues di e reunion, e la bisa di ta trahando continuamente pa por ofrece un miho tarifa pa comunidad. For di aña pasa 2022, WEB a absorba e aumento di tarifa pa shete luna door di e aumento drastico di e Heavy Fuel Oil, resultado cu e tarifanan mester a wordo ahusta na september. Despues di seis luna a evalua atrobe pa wak con e tarifa riba mercado ta bay pa asina sinta hunto atrobe pa mira con ta bay reduci e tarifanan di awa y coriente.

Pa Sr. Rojer diahuebs mainta tabatin un bon reunion mirando cu ta cumpliendo cu e lendersnan y recuperacion di e companianan ta bayendo den bon direccion. Despues cu 2022 a cera cu WEB su perdida di casi 40 miyon florin dor di absorba e aumento di e Heavy Fuel Oil, awor aki ta premira cu por reduci e tarifa gradualmente ora cu por, depende di e mercado.

Si por hacie lo hacie pasobra e meta principal ta pa duna e comunidad e miho tarifa cu por. Director di Utilities Sr. Anthony Rojer a bisa cu ta trahando hunto pa yega na solucionnan cu ta beneficioso pa tur.