Minister Glenbert Croes na Mervin Wyatt Ras: Tin 31 proyecto andando y 24 porciento inverti den Crisisplan Social

Ta obvio cu e unico meta cu parlamentario Mervin Wyatt Ras y AVP tin ta pa bruha tera pa purba score politicamente a costo di e problemanan social cu ta azotando Aruba. Sra. Wyatt Ras ta dispuesto pa hunga cu dolor di hende, cu ta pasando den dificultadnan social, djis pa poryeganasu meta descara.

Un biaha mas parlamentario Wyatt Ras a demostra esaki cu su expresionnan, cu e ta fomenta fake news den nos comunidad. Sra. Wyatt Ras ta trece información eroneo pa purba descredita maneho di un minister y un gobierno cu si a sa di pone e problemanan social como prioridad. Parlamentario Wyatt Ras cu su fake news ta atacha fundacionnan y departamentonan cu ta trahando intensivamente pa trece un structura nobo pa combati e crisis social riba nos isla. E ta desacredita profesionalnan den e tereno social, salubridad publico, husticia y enseñansa cu a pone schouder bou di e crisis, cu su gobierno di AVP a ignora, neglisha y sconde pa e comunidad. Su unico meta ta di purba rebaha y desacredita e Sociaal Crisisplan (SCP).

Den pasado, na mas di un ocasion, a invita parlamentario Wyatt Ras pa no keda para un banda. A invit’e bin duna un man pa aporta na drecha e crisis social riba nos isla. Te hasta a saca un man durante reunion di parlamento y reconoce sra.Wyatt Ras pa logronan den e tereno social pa asina elimina e aspecto partidista cu AVP kier crea riba e topico aki. Pero su mascarada a cay y lamentablemente no a resta ni un suspiro social mas den e alma di sra. Wyatt Ras.

Parlamentario Wyatt Ras ta bisa cu ta solamente 17% a ser gasta di fondonan di Sociaal Crisisplan, cual ta un mentira cu por considera como fake news. Sociaal Crisisplan a demostra di tin transpariencia completo cu raportahe cada 3 luna na gobierno y parlamento pa informa exactamente con e 31 proyectonan ta canando. Actualmente e porcentahe di fondonan di Sociaal Crisisplan inverti ta 24% y mayoria di e proyectonan ta desaroyando segun e plannan presenta. Ta informa parlamentario Wyatt Ras cu tur proyecto ta wordo monitorea y controla pa asina tin transparencia completo den ehecucion di cada proyecto. Gabinete Wever Croes ta un gobierno responsabel cu no ta yega spart placa pa loco. Al contrario, cada cen inverti ta planifica conforme cada proyecto y necesidad di cada instancia, pa kwartaal.

Ta enfatisa na sra. Wyatt Ras cu tur informacio ncorecto ta disponibel y na su disposicion. E number di telefon pa yama ta 528.1100, e number unda antes e mes a traha. Ta tristo si cu mester constata cu te dia di awe, ni ministerio di asunto social ni departamento di asunto social no a ricibi ni un carta, ni un email ni un yamada di parlamentario Wyatt Ras pa informa su mes corectamente di e desaroyonan actualisa di Sociaal Crisisplan, corda pa haya un yamada di apoyo y cooperacion for di e parlamentario aki.