Minister Glenbert Croes kier bin cu un SCP II; Tur 44 profesional riba payroll di SCP ta trahado riba problematica social

Minister di Labor y Asunto Social, Glenbert Croes a declara cu tur e 44 personanan profesional riba payroll di Sociaal Crisis Plan (SCP) ta trahando keto bay pa atende cu e problematica social cu a wordo afecta mas debi na e pandemia aki.

E termino di 4 aña di SCP ta cabando y e mandatario a bisa cu nan lo pidi nos pueblo su confiansa pa renoba nan compromiso tambe den cuadro di e plan aki. Nan por bin cu 33 proyecto cu ta den ehecucion. E ultimo solicitud cu gobierno a haci tabata pa sigui prolonga e fondo di SCP cu a conta cu aprobacion di e fraccionnan den coalicion (MEP-POR-RED)den Parlamento.

Aña pasa nan a aproba 10 miyon florin cu a wordo kita di solidaridad pa atende cu e crisis di Covid, y nan a wordo poni bek den nan presupuesto pa asina termina e proyectonan di SCP. El a gradici nan ya cu a pesar di e crisis financiero cu e pandemia a trece cune nan a aproba e suma ey cu a wordo poni den nan presupuesto pa caba cu e proyectonan.

Pero e mandatario ta considera cu ta prudente ainda pa continua cu un siguiente fase di un Sociaal Crisis Plan II cu e mesun vehiculo presupuestario actual cu ta maneha nan propio fondo. El a anuncia caba na tur instancia cu ta traha riba e tereno social cu lo bin cu un SCP parti II. Sinembargo minister Croes a bisa cu mester tene cuenta cu e realidad financiero di nos pais. Kiermen e fondo cu tabata disponibel na inicio di e plan cu tabata 36.8 miyon florin den inversion social lo por bira menos.

Mirando e situacion financiero actual, e ta kere cu no por logra e magnitud di e fondo ey pa un SCP parti II. Esaki ta trece cune cu mester bin cu un restructuracion treciendo tur actornan hunto pa atende e presion social di forma efectivo y profesional.

El a bisa cu ora nan a bin cu SCP debi na e tragedia di e dos criatura inocente cu a perde nan bida dor di abuso na 2017. Gobierno a bin pa atende cu e emergencia social aki. Pero e ta kere cu nos pais ta biba den un emergencia social permanente. Ya cu continuamente tin hende cu ta cometiendo abuso cu mucha y mester keda actua.

Pues e ta haya cu e SCP a bira e plan di accion di emergencia pa yuda fortifica tur instancia cu ta yuda pa atende cu e crisis social ey, pa protege e mucha di tur sorto di abuso, ya sea fisico, verbal y psicologico. “Hopi sorto di abuso tin!” el a declara.