ORANJESTAD – Dia 15 di maart 1962 den su discurso na Congreso di su pais, e presidente di Merca J.F. Kennedy a declara e.o. e siguiente consideracion: “Ser consumidor, pa definicion, ta inclui nos tur. Nos ta e grupo economico mas grandi riba mercado, cu ta afecta y ta ser afecta pa casi tur decision publico economico… pero nos ta e unico grupo importante di cual hopi biaha no ta scucha su opinion.”

Pa conmemora e discurso aki, e Organisacion di Nacionnan Uni (ONU) na 1983 a institui 15 di Maart como Dia Mundial di Derechonan di Consumidor. Pa prome biaha e consumidor a ser considera. Ta reconoce su relevancia politico, y ta urgi tur institucion pa percura tuma pasonan pa logra proteccion pa cubri e derechonan di consumidor.

Dia 9 di April 1985, e Asamblea General di O.N.U. ta adopta e Guia di O.N.U. pa Proteccion di Consumidornan. E resolucion aki, cu ta cubri e ocho derechonan di consumidor, awendia ta ser reconoci internacionalmente y ta recomenda Gobiernonan pa: “Desaroya, fortifica y mantene un maneho fuerte di proteccion pa consumidor, teniendo cuenta cu principionan menciona den e Guia di O.N.U.”

E ocho derechonan di consumidor ta: riba necesidadnan basico, siguridad, informacion, liber escogencia, representacion y di ser scucha, riba reparacion, educacion pa consumidor, y finalmente, e consumidor tin derecho riba un medio ambiente sano.

Ora nos repasa e ocho derechonan y e Guia di O.N.U. mesora ta resalta cu pa hopi tempo nos no a tene debido cuenta cu esakinan, cu tur e consecuencia cu esaki ta trece cune pa e consumidor y pa nos comunidad. Como ehempel, nos por tuma e prome derecho, esun mas importante, e derecho riba necesidadnan basico. Esaki ta implica cu e consumidor tin acceso na e medionan pa por garantisa; alimento adecuado, paña, vivienda, cuido di salud, educacion, awa, coriente, transporte y sanidad. For di esaki ta resalta cu producto/servicio mester ta disponibel na prijsnan husto y pa cual e mester dispone di suficiente forsa di compra (entrada) pa por adkiri esakinan.

Pa por logra esaki e producto/servicio necesario mester ta riba mercado na prijs husto y entrada di e consumidor lo mester por cubri a lo menos e costo di su necesidadnan basico.

Ora cu persona of famia no por alcansa na cubri necesidadnan basico ta un problema pa nos comunidad y causa di problemanan social.

Como Minister di Asuntonan Social y cu ambicion pa logra mayor bienestar pa nos pueblo

mi a considera y dicidi cu Aruba tin cu renoba su esfuersonan y den forma serio percura pa garantisa cu derechonan di consumidornan ta ser reconoci y aplica na nos pais.

Pa por logra esey, mi ta anuncia awe riba Dia di Derechonan di Consumidor cu:

Gobierno lo bay fortalece e posicion di consumidor y den cuadro di esaki Departamento di Huur y Consumidor ta den proceso di re- organisacion y lo ser fortifica segun principionan di e Guia pa Proteccion di Consumidor di O.N.U.;

Lo apoya y fortalece organisacion di consumidor fundacion C.A.S. cu tambe ta den proceso di re-organisacion y re-activacion;

E dos puntonan aki lo keda formalisa dentro di 30 dia.

Lo duna atencion special na actualisacion di leynan di proteccion na consumidor y na enforsamento efectivo di esakinan;

Lo percura den formalisa y amplia cooperacion entre Depto. di Consumidor y fundacion CAS y tur instancia concerni;

Un di e tareanan principal lo ta concientisa pueblo riba su derechonan como consumidor.

Nos tur ta consumidor – ban uni forsa pa logra trece cambionan na fabor di nos mes.