Minister Glenbert Croes: “Hecho ta cu tur departamento di gobierno falta personal”

Den comienso di siman minister di Labor, Energia y Integracion, Glenbert Croes a tene un conferencia di prensa. Durante e ronda di pregunta di conferencia aki, un miembro di prensa a trece dilanti e tema DIMAS y preocupacionnan cu e directora tin pa loke ta specificamente personal den DIMAS.

E periodista a referi na preocupacionnan cu DIMAS tin pa loke ta e apertura di diferente hotel cu ta bay habri y pa cual ta premira cu lo tin alrededor di tres mil peticion cu ta bay drenta DIMAS, pero no tin personal y ademas di esey tin diferente peticion cu no a wordo aproba ainda.

E mandatario a splica cu nan ta haciendo esfuerso pa mehora e servicio, atencion y tambe e rapidez cu cual ta atende e permisonan. El a indica cu ainda falta mas pa yega na unda nan kier yega.

Minister Croes a menciona cu pa aña DIMAS ta procesa entre 15 mil y 16 mil permiso, di cual segun el a indica, e gran mayoria, alrededor di 80%, ta renobacion y no permiso nobo.

El a sigui splica cu aworaki pa purbando alivia e peso ey door di entrega permisonan multianual cual ya caba ta wordo otorga y e meta ta pa e permisonan multianual por bira accesibel pa mas categoria di trahadonan. “E ta kita un peso for di DIMAS di procesa tur aña 15 mil pa 16 mil permiso, cual hopi di nan ta renobacion,” el a remarca.

E mandatario a agrega cu semper control ta keda tuma luga y ora cu e seccion di inspectornan di DIMAS detecta hechonan castigabel of si tin violacion, DIMAS ta entrega boet y esakinan ta fuerte.

Minister Croes a subraya cu tur departamento di gobierno falta personal, pero den caso di DIMAS specificamente, nan ta haciendo esfuerso pa termina e trabaonan di modernisacion y digitalisacion.

E periodista a puntra e mandatario tambe kico ta su punto di bista ariba e implementacion di servicio di WhatsApp na DIMAS, cual lo wordo implementa dia 1 di juni, mirando cu e preocupacion ta keda e falta di persona.

Minister Croes a expresa cu for di su punto di bista e servicionan ey ta bay yuda pa e clientenan haya un respuesta mas lihe, sea ta un si of un no, y den caso cu ta un no, tin oportunidad pa drecha locual mester drecha y bolbe manda un peticion mas rapidamente.