Ayera tardi minister di Labor, Energia y Integracion, Glenbert Croes, a tene un conferencia di prensa extraordinario pa elabora ariba e ultimo desaroyonan pa loke ta trata e situacion di coriente cu tin acutalmente na Aruba.
Minister Croes a informa cu ayera tardi durante un reunion cu tur e empresanan di gobierno, WEB, ELMAR, UTILITIES y otro instancianan, gobierno a duna aprobacion y instruccion pa nan adelanta y implementa tur e programa di mantenimento di emergencia cu nan mester introduci.
El a remarca cu nan mester haya sa unda e problemanan ta y kico ta ocasionando loke ta sucede recientemente, unda di un forma “abnormal,” yen di caminda coriente ta bay cu casi por pronostica unda coriente ta bay. “Esey pa gobierno di Aruba ta inacpetabel, pa pueblo di Aruba ta incaceptabel. Pueblo tin derecho y rason pa ta rabia ora cu coriente bay,” el a enfatisa.
El a indica cu a pidi e companianan identifica kico ta critico pa asina por sigura cu no tin mas interupcion di coriente.
E mandatario a splica cu nan instrui un oficina di investigadornan experto di Washington DC, MPR, cu a bin pa haci investigacion na WEB den pasado, pa haci investigacion y recomendacion na ELMAR.
El a menciona cu awe e investigadornan experto ta yega Aruba y ta cuminsa e investigacion hunto cu profesionalnan di ELMAR pa constata kico ta e problema y kico ta e solucion y den un siman mester cuminsa e plan pa remedia e problemanan aki.
Impacto di construccion di mas hotel
Den pueblo tin preocupacion pa e presion adicional cu ta bay bin ariba e suministro di coriente unabes cu e hotelnan nobo habri. Agrega na esaki, pa por cubri e cuponan di trabao cu localnan no por cubri, mester di trahadonan di afo.
No ta un secreto cu na Aruba tin un canitdad grandi di trahadonan cu ta traha di forma ilegal, y pa yuda yena e cuponan di trabao aki Gobieno di Aruba a indica cu ta cambia su maneho pa otorga permiso pa personanan cu a drenta Aruba di forma legal, pero a extende nan estadia di manera ilegal.
Relaciona na esaki, Bon Dia Aruba a puntra si e maneho di regularisa hende cu ta kedando na Aruba ilegalmente tin base den Constitucion of pakico a cambia e maneho unda antes tabata nenga permiso pa motibo di a keda Aruba ilegal.
Minister Croes a contesta cu e gran cantidad di stranhero cu ta na Aruba caba tey for di prome cu covid y door di covid nan a keda Aruba. El a resalta cu mayoria di e grupo di stranhero cu a keda Aruba ta ilegal, pero no criminal, y como cu nan tey caba, el a enfatisa, cu e politica di gobierno ta pa duna nan preferencia pa yena e cuponan di trabao cu keda habri despues cu a duna preferencia na yiunan di tera primeramente pa yena e cuponan aki.
