Durante e ultimo conferencia di prensa di Minister di Labor, Energia y Integracion, Sr. Glenbert Croes, Bon Dia Aruba a haci e pregunta na Minister Croes tocante e director nobo di Utilities Aruba NV, y ariba e cantidad di trahadonan den su despacho y e rekisitonan cu cual nan mester cumpli.

Bon Dia Aruba a puntra si a tene e solicitud pa e puesto habri, si director recien nombra pa Utilities Aruba NV, Sr. Anthony Rojer tin conocemento tecnico di WEV Aruba NV y Elmar NV; si e hecho cu e ta cay den famia no ta ratifica e nocion cu e gobierno aki ta beneficia famia of amigo; y si esaki no ta descurasha otro profesionalnan.

Segun Croes a contesta, Sr. Anthony Rojer no ta su famia. Y el a indica cu Sr. Ton Rojer a wordo scogi como e director nobo di Utilities Aruba NV pa su cualificacionnan.

Croes a splica cu e solicitud pa e puesto aki a tuma luga, segun e, aña pasa den diferente medionan di comunicacion. Segun el a indica tabatin 19 candidato cu a aplica pa e trabao y despues di un screening, realisa pa diferente instancianan, tres candidato a wordo recomenda pa e trabao. Y Sr. Rojer a sali como number uno.

El a splica cu Sr. Rojer a sali number uno no specificamente pasobra e ta un ingeniero, pero mas bien mirando cu como director di Utilities Aruba NV e capacidad mas grandi, e virtud como director mester ta administracion di e estado financiero comercial di e dos empresanan cu ta cay bao di Utilities. Y Sr. Rojer, segun Minister Croes a indica, tin un Mba; y mirando su experiencia comercial a dun’e e bentaha a base di cual Sr. Rojer a keda recomenda como candidato number uno.

Croes a enfatisa cu tur e proceso di screening a tuma luga prome cu el a bira minister. “Ora cu mi a bira y a tuma e encargo di energia, tabatin un director interino cu a tuma su retiro boluntario, a laga tur cos atras pa locual tabata e recomendacionnan di e screening. Y a base di esey mi a tuma e decision e ora pa nombra Sr. Rojer director di Utilities Aruba NV”, el a splica.

Bon Dia Aruba tambe a haci e pregunta na Minister Croes tocante cuanto persona e tin den su despacho trahando, con nan ta structura di pago ta y kico ta e rekisitonan pa nan traha cune. Croes a contesta cu e el a keda cu e mesun cantidad di persona den su despacho, 25 trahado. Pero el a bisa cu el a cambia algun hende si, mirando cu aworaki e tin tres ministerio cu cual e ta encarga.

El a menciona e programa nobo, Aruba Kier Traha, cu ta parti di su tarea como Minister di Labor, pa pone e hendenan back na trabao cu mesun intensidad cu nan a maneha e crisis a traves Fase, y aworaki nan ta cuminsa cu Aruba kier Traha.

Riba tereno di energia el a menciona cu tin proyectonan na caminda pa reactiva e economia di Aruba. Y el a señala cu no ta un proyecto so, pero varios proyecto ta na caminda ariba tereno di energia alternativo. El a remarca tambe su esfuersonan den e reactivacion di e refineria di Aruba, cu e ta menciona, ta fundamental pa reactiva economia di Aruba.

“Nos mester di progreso economico pa nos por crea cupo di trabao cu trabaonan bon paga pa nos hendenan por recupera tambe nan calidad di bida cu nan tin derecho ariba dje. E no ta bay ta facil, pero e ta exigi un compromiso inkebrantabel di dia aden y dia afo trahando pa logra e recuperacion ey, pa asina nos por pone nos hendenan back na trabao.”, el a bisa.

Croes a toca un poco tambe ariba e tema di comunidad stranhero y e temanan delicado, cu e ta indica “mester wordo atendi cu humanidad”. El a duna ehempel di DIMAS, unda cu el a menciona cu segun e significado di e letternan di DIMAS, na su parecer e letter I, di integracion, no a haya e importancia necesario.

“Integracion ta unificacion. Ora cu nos ta convivi cu otro akinan nos mester convivi cu otro den solidaridad humano, comprension humano, cooperacion humano, convivi cu otro den paz y harmonia, y mi ta considera esey algo fundamental”, el a indica.

Segun Croes a splica, loke ta bay dirigi su politica di integracion ta bay ta e politica laboral. Genera recuperacion economico, recuperacion laboral pa esnan cu ta akinan y si no tin hende local pa ocupa un trabao, esnan cu ta ‘kinan fisicamente lo tin e oportunidad pa haya un trabao en bes di trece un hende nobo di afo.

Regresando back na e total di persona cu ta traha den su despacho, el a splica cu e tin un limite cu a wordo poni desde gobierno anterior y aworaki e ta bolbe aplica pa e minister, y e ta cumpli cune. El a bisa tambe cu e 25 hendenan di su despacho, ta bin y bay cune y dia cu e no t’ey mas nan no lo t’ey mas tampoco.