Manera Bon Dia Aruba a publica caba den nos edicionnan anterior, diamars a tuma luga un encuentro publico na unda Minister di Labor, Energia y Integracion, Glenbert Croes a presenta e manual di admision nobo cu a drenta na vigor dia 1 di februari, na unda ta delinea e politica y maneho pa admision y integracion.
Den nos edicion di ayera a publica e preguntanan cu parlamentario lider di fraccion MAS, Marisol Lopez-Tromp a realisa na minister durante e encuentro ariba algun punto cu e minister a trece pa dilanti tocante admision, mercado laboral pa local y stranhero y carrying capacity.
Durante su ronda di pregunta, parlamentario Lopez-Tromp primeramente a puntra Minister Croes kico su opinion ta ariba depolitisacion di DIMAS y si ya caba tabatin algun dialogo ariba e topico aki cu Minister President.
“Na prome luga esey no ta e problema, pasobra si bo kier sali for di punto di bista cu pasobra directora interino tabatin machtiging DIMAS ta depolitisa, mi opinion ta cu esey no ta e caso,” Minister Croes indica.
El a splica cu na momento cu el a bira minister di DIMAS, e no tabata contento cu e forma con ta atende hende y con ta duna servicio, cu un dado momento ta dificil pa un persona tramita su permiso pa cual e mester bay busca un tramitador, cu tambe ta costa placa.
El a remarca cu loke a bira esencial tambe ta cu DIMAS su proceso ta hopi mas ‘customer friendly’ y a pesar cu hopi di e servicionan di DIMAS a ser automatisa, e motor di automatisacion no ta na 100% y si na dado momento e yega na 100% e procesonan por cana miho.
Lopez-Tromp a menciona cu hopi hende ta warda contesta, cual Minister Croes a indica ta corecto. Hende cu ta entrega tur nan documento y no ta haya respuesta, hende cu a paga tur e tarifanan cu mester paga y despues ta warda hopi tempo pa un resultado. Un problema cu tin e minister su preocupacion y diferencia di opinion riba e maneho y forma di proceder di DIMAS.
“Obviamente esey ta origen di problemanan cu ta existi desde tempo e minister anterior tabata encarga cu no a ser atendi cune. Bira cara pa problemanan cu ta pasa den Dimas no ta soluciona problema y loke pa ami como minister y ciudadano ta frustra mi ta cu tin ora, papiando di percepcion, tin hende ta pensa cu pasobra un hende ta stranhero, el a bin Aruba, e ta buscando un miho porvenir, bo por trat’e di un forma cu bo ta humilia dignidad di hende y esey pa mi ta inaceptable,” el a enfatisa.
Minister Croes a indica cu ora cu ta papia di depolitisa DIMAS, prome mester drecha e funcionamento y servicio di DIMAS. El a agrega cu e ta spera cu ora keda cla cu e proyecto di mehoracion di servicio y automatisacion di DIMAS, firma di minister ta bay back pa machtiging di e leiding.
El a enfatisa cu esey no ta e caso ainda pasobra tin investigacion andando riba dos funcionario cardinal di DIMAS y e investigacionnan aki mester yega na resolucion pa por sa cual ta bira e cara definitivo di leiding di DIMAS.
E minister a splica cu mientras e ta minister, si e duna machtiging na e leiding di DIMAS back, contrario na pasado ora cu tabata duna machtiging na director of sub-director y e nomber di e director of sub-director tabata aparece riba e permiso den nomber di minister, aworaki su intencion ta cu na momento cu e duna machtiging firma di minister ta bay sali riba e permiso.
“Na final di dia hasta si mi machtig, e responsabilidad ta keda cerca mi,” el a subraya.
Carrying Capacity
Pa loke ta e tema hotel y carrying capacity, e lider di fraccion MAS a trece pa dilanti durante su ronde di pregunta cu carrying capacity tin hopi di haci cu e tema di admision y integracion.
Minister Croes a splica cu e carrying capicity pa loke ta trata hotelnan a ser defini pa e cantidad di hotel cu tin den realisacion. No obstante e presion riba carrying capacity cu esaki ta ocasiona, el a resalta cu e no por cera su wowo como Minister di Labor cu hotelnan ta wordo construi y mester trahado pa construccion y pa operacion di e hotel.
“Nos yiunan di tera ta hayando hopi trabao, pero e realidad ta cu tin hopi mas trabao cu tin trahado y esey ta e motibo dicon ta treciendo trahado di afo,” el a subraya. Ademas el a agrega cu tin cierto trabaonan cu e hendenan local no kier haci mas, por ehemplo housekeeping, cual segun el a indica ta un tendencia mundial, no na Aruba so, cu hopi biaha esnan cu ta traha housekeeping no ta hendenan local.
Esaki, el a menciona, ta un parti tambe di e preocupacion cu e tin pa loke ta e clientenan di bijstand cu mester mercado laboral back. El a remarca cu den e clientenan di bijstand tin problemanan hopi mas compleho cu tin di haci cu e empleabilidiad di e persona y problemanan social.
“Mi opinion personal como ex-minister di sociale zaken ta cu si bo no duna comercio un incentivo pa tene man di esun cu ta cobra bijstand, pa yud’e tene e trabao, e ora no ta bay logra integra mas hopi persona di bijstand riba mercado laboral,” Minister Croes a expresa.
El a trece pa dilanti cu indicacion den e analisis di cifranan di mercado laboral hopi persona cu tabata cay den e grupo di hendenan inactivo den e mercado laboral, cu no tabata buscando trabao, aworaki ta buscando trabao y ta hayando trabao.
Pa loke ta e pregunta di palabracionnan cu Gobierno di Aruba tin cu hotelnan, Minister Croes a splica cu e tin contacto cu tur y cu e ta traha di cerca cu tur y su meta ta percura pa tin trahado pa tur hotel.
El a remarca cu e ta kere cu e politica di integracion responsable ta ser midi pa e cifra di desempleo, pasobra esey ta mustra cu e ta bahando a pesar cu ta haciendo un integracion efectivo di stranhero den mercado laboral; e cifra ta demostra cu e yiunan di tera ta hayando trabao na prome luga, pero no obstante ta integrando tur hende cu ta fisicamente ‘kinan caba.
“E unico cos cu mi por bisa cu ta determinante pa Ministerio di Labor, ta cu nos tin asina hopi proyecto di hotel cu mester trahado y mi tarea ta traha cu nan pa nan tin trahado. E tema di carrying capacity mester a wordo pensa prome cu a duna permiso pa tur e hotelnan, honestamente. Aworaki hotelnan ta wordo construi y nan tin cu wordo opera. E ta un realidad cu mester biba cune. Mare nos por a hiba e discusion aki prome cu e permiso di e hotelnan ey a wordo duna,” el a enfatisa.
Parlamentario Lopez-Tromp a puntra tocante e permiso pa proyecto special, cuanto hotel tin esaki y kico ta e proceso. Minister Croes a indica cu IberoStar, St. Regis, proximamente Hilton y Secrets, ta hotelnan cu tin permiso di proyecto special pa funcionnan specialisa.
El a splica cu e proceso di e permiso aki ta cu e cumplimento ta wordo haci despues. E hotel ta ricibi un pre-aprobacion y cumplimento y screening ta wordo haci despues pa DPL y DIMAS. E proceso ta pa no tranca e trabaonan.
E punto aki, el a resalta, ta lago cu den consulta e gremionan tabata keha riba dje, cu e procesonan ta demasiado burocratico mirando e rapidez cu e construccionnan ta bayendo y netamente pa e motibo ey a introduci e permiso pa proyecto special.
