Minister Glenbert Croes: “E parti cu ta toca gobierno como accionista final… esey ta loke e 15 miyon florin ta representa”

Recientemente, minister di Energia y Labor, Glenbert Croes a contesta tocante e critica cu a bin dilanti pa e presupuesto di Utilities den cual ta presupuesta 15 miyon florin di ganashi pa proximo aña, indicando cu e ganashi ta pa accionista, Gobierno, pa cumpli cu su obligacionnan financiero.

Un miembro di prensa a puntra Croes con por ta posible cu gobierno a presupuesta un ganashi di 15 miyon florin di Utilities pa otro aña, dunando impresion cu talbes no tin intencion pa baha prijs di awa y coriente.
A cuestiona si no lo ta un miho opcion pa aloca e 15 miyon florin aki pa “duna pueblo un alivio” cu prijs di awa y coriente.

Croes a contesta bisando: “Ora WEB, ELMAR y Utilities traha nan presupuesto, nan ta traha nan presupuesto pa nan inversion, costo di operacion, e maneho di gobierno cu kier reduci [prijs di] awa y coriente, y tambe pa e parti cu ta toca gobierno como accionista final di e consorcio di Utilities, WEB cu ELMAR y esey ta loke e 15 miyon florin ey ta representa.”

Ademas, Croes a bisa cu e placa ta pa cubri e compromisonan cu gobierno, cu Pais tin, pa cubri diferente compromiso financiero. “No ta secreto e nivel di debe cu nos tin, no solamente di pandemia, pero prome cu e pandemia, cu Gabinete Mike Eman a laga pa nos, cu ta compromisonan financiero cu Pais Aruba mester cumpli. Kiermen, tin un presupuesto planifica pa tur esaki.”

Sinembargo, segun Croes, “loke ta importante ta cu door di introduccion di Eagle LNG, door di nos programa di hedging, door di esfuersonan pa busca HFO – in un tender tumando lugar aworaki na FEMSA – y nos esfuersonan cu Petroecuador, pa cumpra e fuel aki mas barata pa asina e descuento – ohala nos haya descuento – wordo traduci, wordo pasa, pa WEB por baha prijs di awa y coriente.” E mandatario a bisa cu “mester haci todo por todo” pa alivia costo di bida y diferente componente di costo di bida manera awa, coriente, cuminda, gasolin, entre otro. El a indica cu gobierno ta comprometi pa logra baha e costo di bida. El a bisa ademas cu si e proyectonan y esfuersonan di gobierno duna resultado, esaki lo conduci na reduccion di prijs di awa y coriente.