No ta un secreto cu na Aruba tin un cantidad grandi di persona cu ta traha di forma ilegal, y di otro banda gremio comercial y sector horeca a trece pa dilanti nan preocupacion pa e escasez di empleado cu tin na Aruba, cual ta bay aumenta un bes cu e hotelnan nobo habri nan porta. Pa yuda yena e cuponan di trabao aki Gobierno di Aruba a indica cu e ta cambia su maneho pa otorga permiso pa personanan cu a drenta Aruba di forma ilegal

Durante un conferencia di prensa recien reportera di Bon Dia Aruba a puntra minister di Labor, Energia y Integracion, Glenbert, si e maneho di regularisa hende cu a bin Aruba ilegal tin base den Constitucion of pakico a cambia e maneho unda antes tabata nenga permiso pa motibo di a keda Aruba di forma ilegal.

Minister Croes a contesta cu tin un grupo, e gran cantidad di stranheronan na Aruba caba, ta na Aruba for di prome cu Covid y door di Covid nan a keda Aruba. El a resalta cu un cantidad di e grupo aki ta indocumenta, pa motibo di e situacion na nan pais y no kier a bay back, pero nan no ta criminal.

El a indica cu e desaroyo economico cu Aruba tin, nan ta dunando preferencia na e yiunan di tera pero ta bay tin mester trahadonan di afo pa yena e cuponan di trabao cu ta keda habri Aruba. “Nos tin mester di trahado, nan ta akinan caba. Politica di gobierno ta duna nan preferencia,” el a remarca.

E mandatario a splica cu aworaki e discusion ta den ki forma responsabel por duna preferencia na esnan cu ta no solamente ta na Aruba, pero cu ta trahando caba. El a señala cu si e personanan aki cu ta indocumenta ta trahando caba di forma ilegal, pakico no laga nan pasa un screening pa nan traha legal na Aruba y contribui na impuesto, AZV, OAV y economia di Aruba.

Minister Croes a agrega cu como cu nan ta trahado ilegal hopi biaha nan ta wordo explota como trahado, como hende y esey ta e preocupacion di riesgo cu e plataforma di tur e organisacionnan cu ta traha pa yuda e comunidad stranhero ta trece dilanti.

El a splica cu e maneho cu gobierno ta dirigi na busca un forma responsabel cu ta duna e yiunan di tera preferencia den e mercado laboral. “E maneho cu nos ta hibando ta cu pa bo haya permiso bo mester pasa un debido scrutinio. E intencion ta pa sigura e preferencia, e motivacion pa un dunador di trabao bay pa e yiu di tera, bay pa e trahado local,” el a agrega.

E mandatario a indica cu tin dos cos cu a wordo constata. Uno ta cu e gremio comercial ta bisa cu no tin trahado y cu nan mester di trahado. El a resalta cu esey nifica cu nan no ta hayando trahado stranhero facil.

E otro cos cu a wordo constata ta cu desempleo ta sigui baha, locual ta indica cu yiunan di tera ta hayando trabao prome, pero tin mas di dos mil ciudadano cu ainda no tin trabao.

“Nos kier pa tur cu por traha bay traha, pero mester yuda nan. Nos no kier yuda nan haya trabao so, nos kier yuda nan keda na trabao y eynan e comercio y gobierno mester tene man,” el a remarca.

E mesun luna aki parlamentario y lider di fraccion MAS, Marisol Lopez, a publica un video den cual e ta cuestiona y critica e maneho di integracion di Minister Croes.

E parlamentario a remarca cu na e momento aki, e enfoke di gobierno ta puramente riba legalisa cosnan ilegal. El a ilustra den su video prome minister splicando cu yega como turista y “overstay” no lo conta contra legalisa e situacion di un inmigrante, y cu mayoria di persona indocumenta na Aruba a yega legalmente como turista pero a surpasa nan estadia.

Tromp ta continua bisando cu e maneho aki ta “premia ilegalidad y cu gobierno ta haci propaganda pa hende bin di afo.

“Gruponan ta drenta, supuesto profesional, caminda cu minister Glenbert Croes ta firma, ta aproba esaki, y ta bisa ‘tin un oportunidad pa Aruba mirando e scarsedad di trahador cu tin, cu tur hende cu ta fisicamente na Aruba caba, of si bo ta ilegal, bo ta fit den e politica di integracion,’” el a destaca.

El continua bisando cu na mes momento por wak tambe cu ta firma y bisa di antemano caba na e companianan aki, cu minister Croes ta priminti y sigura nan, cu e departamentonan cu ta cay bao dje, esta Dimas, DPL, entre otro, lo coopera tur cu nan sin sa si nan ta bay cumpli cu tur e rekisitonan cu ta rekeri pa ley aki na Aruba.

Entre e rekisitonan, ta inclui cu mester no tin antecedente penal, pa loke Tromp ta cuestiona ken ta controla si e personanan en cuestion tin antecedente penal of no.

Na final di luna di januari Aruba Food and Bevarage Association (AFBA) a trece dilanti nan preocupacion pa loke ta trata escasez di personal den e sector di horeca durante un conferencia di prensa. Un situacion cu no solamente ta afecta e sector aki, pero henter e gremio comercial cu tambe na mas di un ocasion a trece e topico aki dilanti tambe.

E problema di escasez di personal no ta algo nobo, e ta algo cu tin varios aña caba ta creciendo. E entidad tin dos aña caba ta trahando duro hunto cu instancianan di gobierno y ministerio pa por logra suministra e necesidad di personal cualifica of personanan cu tin deseo di traha den e sector horeca.

Durante e conferencia di prensa a bin dilanti tambe e punto di trahadonan indocumenta cu tin deseo di traha den e sector aki, pero e organisacion a remarca cu e sistema cu tin actualmente pa loke ta trata e proceso pa saca permiso ta uno burocratico.

Segun e institucion e problema cardinal cu tin cu e proceso di saca permiso ta e trayectoria di

pidi un permiso te ora cu nan haya un permiso, locual ta tarda y por ta costoso. Di otro banda nan no por fomenta contrata personal sin permiso.

Un miembro di e organisacion cu tabata presente na e conferencia di prensa e momento ey a remarca cu aworaki un persona stranhero ta haya e prome permiso, locual ta un mehoracion pasobra tabatin un tempo cu nan no tabata haya ni e prome permiso mes, pero aworaki tin otro problema, cual ta cu e persona mester keda traha cu e mesun compania pa tres of cinco aña.

Un punto cu pa e comerciante ta fastioso pasobra si algo pasa of e persona kier bay of e compania no ta contento mas cu e persona ey, mester por tin e oportunidad pa e persona cambia e permiso mas lihe.

Na final un problema ta agrega na otro y ta haci e preocupacion mas grandi mirando cu tin mas hotel cu ta na caminda y esey ta aumenta e demanda di personal, algo cu ta hopi alarmante.