Ayera durante reunion publico den Parlamento di Aruba, minister di Labor, Energia y Integracion, Glenbert Croes a elabora y a contesta pregunta di parlamentarionan ariba e topiconan, entre otro, di maneho di migracion, carrying capacity y desempleo.

Minister Croes a remarca cu como minister encarga cu cartera di integracion pa poco mas di dos aña y e cartera di labor pa shete aña, e ta un oportunidad grandi e hecho cu ministerio di labor y ministerio di integracion ta hunto pasobra un di e desafionan mas grandi cu ta bay tin ta e hecho con por percura pa e yiunan di tera haya trabao prome y drenta mercado laboral.

Di otro banda, caminda cu no tin yiunan di tera disponible pa yena cualkier vacatura, mester delinea con por realisa un integracion responsable, cu e debido scrutinio y screening, pa asina sigura cu tin e perfil di ciudadanonan stranhero cu kier drenta e mercado laboral y cu e mirado laboral merece y tin necesidad di dje.

El a enfatisa cu e liña cora den e proceso pa permiso di trabao ta cu si un persona tin antecedentenan penal, no por yega na remarca pa e proceso di integracion y si e persona a drenta Aruba via lancha clandestinamente, tampoco no por yega na remarca pa e proceso di integracion y e ora ta recomenda nan pa realisa e procesonan di repatriacion.

Ariba e tema di carrying capacity minister Croes a ricibi hopi pregunta. El a subraya cu dia cu a parti terenonan pa hotelnan na Aruba, no a pensa riba e carrying capacity y no a pensa riba e consecuencianan di e carrying capacity.

“E realidad ta, y mester reconoce, cu ora cu a duna tur e terenonan pa hotelnan el a pasa e limite. Asina cu bo mester trece trahadornan di exterior pa traha den e mercado laboral, esey ta bisa bo caba cu bo a pasa bo limite,” el a resalta.

E mandatario a ratifica cu e desafio cu pais Aruba ta enfrenta ta cu e aña aki tin tres hotel ta bay habri nan porta, locual ta nifica cu un total di tres mil camber ta bay habri. Segun el a indica, basa riba calculacionnan cuanto trahado mester pa cada camber y segun implicacion esaki ta trece cune cu pa cada trahado mester un hende mas, e impacto riba e mercado laboral ta bay ta di tres mil camber multiplica cu tres.

“Casi 10 mil hende tin necesidad di dje riba mercado laboral pa e hotelnan so cu ta bay habri. Nos no ta papiando di e otro negoshinan cu ta bay habri, otro negoshinan cu ta bay habri rond di e hotelnan. E impacto ta bay ta hopi mas,” el a enfatisa.

Otro pregunta cu el a ricibi for di varios parlamentario tabata e pregunta tocante su relacion cu directora di DIMAS, Kathy Paskel. Manera ta conoci den pasado e relacion no tabata uno sostenible te cu hasta minister Croes a suspende Paskel for di su posicion y a mando traha na un otro posicion, te ora cu corte a indica cu loke minister a haci no tabata corecto y ordena pa Paskel bay back DIMAS.

Ariba esaki, minister Croes a bisa cu e tin un bon comprendemento cu e directora di DIMAS y cu na den su opinion tin un dialogo constructivo entre nan dos. “Nos ta comunica cu otro, nos ta trahando cu otro, mi ta wordo apoya door di e staff cu alabes ta forma parti di DIMAS y cu tambe ta apoyando trabao entre e director y di mi como minister,” el a indica.

Pa loke ta e preguntanan ariba e cifra di desempleo, e mandatario a splica cu momento cu el a asumi su rol como minister di Labor pa prome biaha, el a haya e cifra di desempleo na 8.9%, cual tabata na 2017. El a remarca cu e maneho di yiu di tera na prome lugar, e prome resultado e aña siguiente tabata cu e cifra di desempleo a baha na 7.3% y e aña siguiente desempleo a baha na 5.2%.

El a agrega cu durante e pandemia di COVID-19 desempleo a subi drasticamente te na 8.6% na 2020 y 8.8% na 2021. Pero despues cu economia a drenta recuperacion a traves di recuperacion di turismo, desempleo a cuminsa baha back y ultimo cifra na 2022 tabata un record nobo di 4.3% y pa aña 2023, segun e ta indica, ta premira a base di midinan interno administrativo cu ta wordo haci y mirando e cantidad di hendenan cu ta subiendo e mercado laboral, e indicacion ta cu e cifra di desempleo ta keda mescos of ta baha mas.

“Mientras cu nos mester mas hende riba mercado laboral y ta premira pa e tres mil cambernan cu ta bay habri, ta bay tin mester entre nuebe mil pa dies mil hende cu lo bin extra riba mercado laboral. Ta premira cu tin mas o menos 10 mil hende indocumenta na Aruba, pero e hecho ta keda cu nos preferencia mester ta pa pone yiunan di tera na trabao,” el a enfatisa.

Pa loke ta trata e topico di DIMAS y maneho di integracion y inmigracion, mayoria parlamentario a resalta preocupacionnan ariba cuanto problema tin na DIMAS. Minister Croes a subraya cu e problemanan aki no a cuminsa di awo.

El a splica cu recientemente tabatin reunion cu Departamento di Recurso Humano (DRH) y Immigratie Naturalisatie Dienst (IND) di Hulanda pa DRH y IND ehecuta e reorganisacion di DIMAS cu nan a haci na añanan 2005 y 2006, pa asina nan bolbe revisa tur e procesonan, yuda den e proceso di automatisacion, modernisacion y innovacion cu tumando luga den DIMAS.

Por lesa mas di e topico aki den nos edicion di Bon Dia Aruba di mañan.