ORANJESTAD – Diabierna ultimo, e titular di Asunto Social y Labor a haci su prome reportahe na Parlamento di Aruba encuanto ehecucion di e Crisisplan Social. Aña pasa, Parlamento den su totalidad a aloca 34 miyon florin den un fondo presupuestario pa atende cu Asunto Social, cu a deteriora gravemente ultimo decada.
Segun un comunicado di gobierno, ta despues di hopi aña cu un gobierno ta respeta e organo mas halto di Aruba cu ta nos Parlamento, rindiendo cuenta di e proceso, ehecucion y adelanto te cu awor, desde su inicio.
Di e forma aki, minister Glenbert Croes ta mustra cu su hechonan con un bon gobernacion a base di transparencia y integridad, mester funciona den practica.
Parlamento a haya descripcion na placa chikito kico tur a inverti te cu awo den e sector social. Parlamento den su totalidad a keda satisfecho cu e transparencia di e mandatario y cu e adelantonan registra te cu awo.
Croes ta gradici Parlamento pa e confiansa y apoyo. Corectamente manera e mandatario e expresa: “E trabou di Asunto Social no ta trabou di un partido so, pero di henter un pais.”
