Minister Glenbert Croes a reacciona; Grupo End Child Abuse mester mira SCP como mecanismo di yudansa

Danny Marquez di grupo End Child Abuse ‘Ta Basta’ a yega di expresa nan malcontento riba con nan solicitud a wordo neglisha di parti di gobierno y Parlamento.

Aunke e colaboracion entre nan grupo y plataforma di Social Crisis Plan (SCP) a keda publica den nos edicion di ayera, Marquez a laga sa cu: “E comunicacion cu SCP a bay un poco malo y nos tambe a cansa di sinta warda sin haya contesta…”

A pesar cu nan a wordo informa cu algun puntonan di nan manifiesto a wordo teni na cuenta y cu nan a bin cu e cambio pidi. Pero e grupo aki ta prefera di wak e puntonan aki firma preto riba blanco… pero nada t’ey ainda. Nan ta hopi desapunta cu nan lucha contra abuso di mucha no ta wordo teni na cuenta debidamente. Mientras si Parlamento a duna prioridad riba otro leynan pa bin cu cambio, entre nan esun di prohibicion di piscamento cu harpun.

Durante un conferencia di prensa diahuebs ultimo, minister di Labor y Asunto Social, Glenbert Croes a expresa cu nan tin respet pa Sr. Marquez y tur su team di End Child Abuse. Te hasta e mesun dia ey nan tabatin un reunion programa entre nan y SCP. “Mi kier bisa si cu Social Crisis Plan no ta e enemigo,” el a declara. E mandatario kier pa e grupo aki por mira SCP como un mecanismo di yudansa.

E mandatario ta gradici cu e grupo aki no ta keda keto den su lucha. Ya cu e ta mira cu e berdadero enemigo di e problemanan social na Aruba ta silencio. E hendenan ta keda keto y nan no ta denuncia. Nan no ta bisa nada y nan no ta protesta. “Loke e fundacion End Child Abuse si ta haci,” el a expresa.

Segun e mandatario nan a tene diferente reunion cu e grupo aki, unda e mes hunto cu minister di Husticia a participa. El a bisa cu a duna instruccion na SCP pa haci stichting End Child Abuse, un socio di nan plan di accion.

Tambe nan ta hayando asistencia tecnico y supervision for di organisacionnan internacional pa atende cu e problematica social. E mandatario a cita varios proyecto entre nan e meld code, Centro di Cuido San Nicolas, etc… pa purba di mitiga e problema social. Nan ta 31 proyecto cu nan a bin cune desde 2018 pa ehecuta pa medio di e SCP. Esaki a pesar cu e por scucha cu nan ta resalta cu mester wordo haci mas. Pero segun minister Croes, e gobierno aki ta esun cu a yega di haci mas pa ataca e tema di abuso di mucha, apart di e castigo cu a wordo aumenta.