Minister encarga cu Energia, Glenbert Croes, a realisa un biahe pa Spaña conhuntamente cu delegacion di Aruba conforma pa entre otro, director di WEB Aruba N.V, Alfredo Koolman, y director di Utilities Aruba N.V, Anthony Rojer, pa asina sostene diferente reunion relaciona cu e vision energetico di Aruba.
Tocante e concretisacion di Aruba Hydrogen Valley, Hydrogen Valley di Groningen a duna un conseho pa sostene diferente reunion cu stakeholders.
Den cuadro di e mision aki, ya e mandatario di Energia a reuni cu cadena hotelero Iberostar, e cual su hotel y resort tur ta wordo opera via energia sostenibel y na e isla di Mallorca, completamente riba hidrogeno.
A habri e siman na Spaña cu reunion cu INDRA/MINSAIT. Esaki ta un compania cu na nivel global ta lider den tecnologia, presente den mas di 140 pais na mundo cu 56 mil profesional den servicio.
INDRA su experticio y specialisacion ta riba diferente area, entre otro Energia y Utilidad, pero tambe riba Defensa y Siguridad, Salubridad, Sostenibilidad, Defensa Cybernetico, Trafico Aereo y Transporte.
Leonardo Benítez, ken ta e director cu ta maneha Utilidad y Energia, a duna un presentacion interesante asisti pa Marcelo Marrino, ken ta e Director di Energia. Durante e presentacion aki, a toca diferente tema, entre otro di e tecnologia den tur e areanan cu nan ta domina. Na mes momento a presenta na e mandatario tur e companianan cu nan ta traha cune na nivel global.
A presenta na e Minister di Energia di Aruba e tecnologia cu nan ta ofrece pa sigura un miho control di uzo di awa y coriente por medio di smartmeters pa no solamente e consumidor, pero tambe pa e compania estatal tin un miho bista y control di consumo en general.
Durante e biahe aki, e delegacion di Aruba tambe a reuni cu Acciona Energia, cual ta un grupo global di desaroyo cu tin como punto di salida pa inverti den solucionnan sostenibel di energia nobo y renobabel pa un miho planeta.
Durante su reunion cu Acciona, e mandatario Arubano a entrega e plan di energia di Aruba na e CEO, Rafael Mateo, y a presenta e vision di Hydrogen Valley Aruba.
Mateo a mustra su interes den Aruba y ta di opinion cu awo ta tempo pa logra posiciona Aruba den Caribe como e “showcase” di hidrogeno y energia renobabel.
Tambe e mandatario a elabora riba e vision cu e tin pa e Refineria di Aruba, pa su desaroyo y restructuracion cu ta completamente a base di energia limpi y pa riba e propiedad di refineria destina un area pa entre otro Aruba Hydrogen Valley.
E delegacion di Aruba ta bay ta bishita Mallorca den cuadro di e proyecto Aruba Hydrogen Valley. Mallorca ta e prome isla cu a transforma pa uso di energia limpi y sostenibel, hidrogeno.
