Como parti di e vision di Minister di Asunto Economico, Comunicacion y Desaroyo Sostenibel, sr. Geoffrey Wever, e sosten di fondo for di Union Europeo ta esencial pa logra e transicion pa yuda reduci gasto y emision di CO2 pa e autonan di gobierno.
Recientemente, Minister Wever a entrega e prome 4 autonan electrico na Departamento di Asunto Economico, Comercio y Industria (DEZHI) como parti di e programa piloto pa e transicion pa autonan electrico of hibrido den ful Gobierno.
Despues di a haci un estudio di mercado hunto cu DOW, a haci tambe un inventario detaya di e flota di auto di Gobierno y di e opcionnan disponibel na Aruba. E enfoke a cuminsa riba e autonan di lease den uso na DEZHI. Siguientemente, a firma un acuerdo historico cu Elmar na april ultimo, unda cu Elmar lo zorg pa e infrastructura di EV charger na Sunset Plaza, caminda DEZHI ta localisa actualmente.
E plan y vision aki a keda presenta na GO-Facility (Green Overseas) pa Minister Wever hunto cu DEZHI y DOW en busca di sosten tecnico y financiero como tambe e implementacion di e proyecto aki. E esfuerso aki tabata uno exitoso mirando cu e programa di Green Overseas (GO) y Union Europeo (EU) a aproba y tambe opta pa financia esaki.
Na mes momento e compania Expertise France (EF) lo ta encarga pa realisa e proyecto aki, cu e meta di contribui na un desaroyo duradero y inclusivo di e paisnan/teritorio exterior di EU y tambe Reino Hulandes. Pa esaki a aloca €190.000 pa realisa e transicion pa autonan electrico dentro di e departamentonan gubernamental. Cu e programa piloto di transicion aki Minister Geoffrey Wever ta demostra cu e colaboracion aki ta un ehempel di con por haci uzo di fondo di Union Europeo cu ta destina pa contribui den teritorionan pafo di Europa.
Pa loke ta trata asistencia tecnico, GO-Facility a saca un destaho publico internacionalmente cu e enfoke riba regulacion di prijs pa e mercado di energia na Aruba na un nivel macro economico. Ultimo dia pa entrega esaki ta 16 di September binidero.
Minister Geoffrey Wever a expresa su gratitud pa e pasonan tuma te cu awor den realisacion di e Plan di Accion Nacional pa Desaroyo Duradero & Inclusivo 2023- 2025. “Cu reduccion di gasto operacional y di emision di auto na Aruba nos ta promove miho calidad di bida, proteha naturalesa y contribui na frena e cambio climatico. No tin nada mas miho como Gobierno di Aruba pa tuma e rol ehemplar aki pa otro pais cu ta encontra e mesun retonan, pero tambe den propio cas”, Minister Wever a expresa.
