Minister Geoffrey Wever: “Tur cos ta cla pa combati economia informal na Aruba”

Economia informal ta birando mas grandi a traves di rednan social y Aruba no ta un excepcion. Pa cu esaki, minister di Asuntonan Economico a sigura cu den proximo dianan comunidad ta bay haya sa e pasonan concreto cu su ministerio ta tumando contra economia informal, na unda hopi hende ta gana placa treciendo mercancia di afo sin paga belasting.

Riba social media por mira basta publicacion di personanan cu ta biaha na diferente pais y ta trece nan mercancia pa nan por bende esaki na Aruba sin necesidad di ta registra na Camara di Comercio, loke ta ocasionando un competencia no husto pa mercado local.

Minister Wever a informa cu na 2021 Departamento di Asuntonan Economico, Comercio y Industria hunto cu profesor Schneider, un experto renombra riba e tema di economia informal, a conduci un investigacion pa determina e grandura di e actividadnan economico den e sector informal. E investigacion a conclui cu e balor di actividadnan economico den e sector informal ta 20% di e producto interno bruto.

Basa riba e resultado aki, minister Geoffrey Wever a pidi Departamento di Asuntonan Economico, Comercio y Industria traha un plan di accion pa combati e economia informal na Aruba.

Ora ta papia di e sector informal of economia informal ta papia di actividadnan economico cu simplemente bisa no ta cumpli cu leynan existente. Esaki ta encera entre otro no ta inscribi na Camara di Comercio, no tin permiso pa haci negoshi y no ta registra na Departamento di Impuesto. Esaki ta nifica cu esnan activo den e sector informal no tin e gastonan cu esnan cu si ta cumpli cu leynan. Esaki ta crea un situacion di competencia inhusto pa companianan cu si, na e manera corecto ta cumpli cu nos leynan.

Pa combati e desaroyo aki, na luna di maart ultimo minister Geoffrey Wever a ricibi bishita di Departamento di Asuntonan Economico, Comercio y Industria. Durante e bishita aki directora Maria Dijkhoff-Pita, Judesca Briceño y Jason Lejuez a elabora riba e plan di accion “Reducing the Aruban Shadow Economy.”

“Nos desaroyo economico ta depende grandemente di nos comerciantenan cu ta inverti y crea e cuponan di trabao y ta cumpli cu nos leynan, p’esey ta importante pa garantisa cu e punto di salida ta igual pa tur comerciante y esaki ta un plan di accion aki ta e prome stap pa combati e economia informal.” Minister Wever a sigura.