E proyecto di revitalisacion di fase uno pa Oranjestad a topa cu algun trabao di infrastructura extra bao di tera relaciona cu un tuberia di e sistema di riolering. E problema aki ta ser aborda pa por sigui cu e trabaonan di embeyecemento. Despues di a cuminsa kita tur loke tin existente a bin constata cu un bakprofiel, esta un tubo di concreet kibra.
E trabaonan di revitalisacion di Oranjestad ta un proyecto hopi importante pa nos isla y lo tin un impacto positivo riba e economia y turismo. Mirando cu Wilhelminastraat y Columbustraat ta un area cu ta ricibi hopi molester di awa den tempo di yobida ta importante pa e tuberia nan ta den bon condicion pa no trece molester innecesario den futuro.
Na e momento aki DOW ta trahando pa por soluciona e problema cu e tuberia aki, pa asina contratistanan por sigui cu e trabaonan di revitalisacion. “A pesar di contratiempo, nos ta spera cu e trabaonan aki lo keda completa den un periodo di tempo mas cortico posibel”, minister Wever a comenta.
Minister Wever a expresa su comprension pa e sintimento di comerciantenan di e area, y ta pidi nan disculpa y alabes comprension pa cu e situacion. Ta haci peticion pa pueblo di Aruba sigui sostene e comerciantenan di e area durante e periodo di trabao pa por logra un Oranjestad revitalisa y bunita pa tur hende di Aruba y e turistanan cu ta bishita nos isla por gosa di dje.
