Ayera mainta durante un conferencia di prensa di minister di Comunicacion, Asuntonan Economico y Desaroyo Sostenibel, Geoffrey Wever, el a splica e desaroyonan tocante de prijs di gasolin cu tin e preocupacion no solamente di henter comunidad sino di gobierno tambe.

Manera ta conoci, no solamente na Aruba sino tambe na otro paisnan rond di mundo e prijsnan di gasolin a bolbe subi unda cu Wever a bisa cu esaki ta punto un preocupante no pa comunidad so sino tambe pa gobierno, unda cu prijsnan den luna di mei ultimo a aumenta drasticamente riba mercado internacional.

E sistema cu Aruba ta maneha segun Wever a splica ta cu e prijsnan di e luna anterior ta wordo carga den e luna despues, loke ta nifica cu e aumento di prijs cu Aruba ta wak awe ta un prijs cu a wordo realisa caba den e luna di mei.

Diaranson ultimo e gasolin a subi cu 32,2 cen y prijs di diesel a subi na 1,3 cen, loke a hiba e prijs di gasolin na 3 florin cu 21 cen y diesel na 2 florin cu 90 cen.

“Un sumanan sumamente halto cu ta un preocupacion no solamente pa comercio sino pa cada ciudadano di nos pais”, el a bisa.

Ademas, el a señala cu gobierno sa cu ta bay tin impacto den inflacion unda cu lo duna espacio na comerciantenan pa ahusta nan prijs y cu ta un situacion cu ta preocupa nan, “como minister cu ta anuncia e aumento di prijs e ta mi tarea pa informa nos comunidad, informa nos ciudadanonan di e desaroyo aki y mi kier pa pueblo compronde cu esaki ta consecuencia di desaroyo internacional, guera na Ucrania y proyeccionnan ta cu door di e guera cu no lo termina prome cu 2023, prijsnan ta bay sigui aumenta”, Wever a indica.

Asina mes, el a bisa cu tabatin proyeccionnan cu prijs di petroleo lo subi te hasta 140 dollar pa bari unda cu te diamars ultimo tabata na 120 dollar pa bari manera el a sigura, esaki ta nifica cu e desaroyo internacional tin como consecuencianan cu prijsnan internacional lo sigui subi y door cu Aruba ta un pais chikito y completamente independiente di produccion internacional, ta sinti e efecto aki inmediatamente.

Tambe, Wever a comenta cu den varios ocasion nan a bin dilanti pa bisa cu nan ta purba door di CAft pa bin cu un calculacion alternativo pa asina wak si por absorba e parti di e aumento, pa esaki CAft su conseho tabata negativo, “nos a haci diferente calculonan, pa wak kico e posibilidadnan ta, nos a bin cu calculonan cu bo por yama un poco creativo, caminda nos a bisa ban maximalisa e entrada di gasolin pa pais Aruba cu por ehemplo a cobra na 2019, cu tabata un suma di 80 miyon florin, 24 miyon na BBO y 55 miyon na accijns basa riba e volumen cu nos a importa”, el a sigura.

Den prijs di gasolin di Aruba tin di un banda accijns cu ta algo cu Wever a señala cu ta continuo, e ta basa riba volumen y e volumen den principio no ta cambia, pa motibo cu tur aña Aruba ta importa mas o menos e mesun cantidad di gasolin, pero despues di e accijns tambe tin e dos schakel di BBO y e BBO ta progresivo, e ta un porcentahe cu cada bes cu e base ta subi, e entrada di BBO tambe ta subi y na dobel pa via cu ta dos biaha e BBO.

Ora cu Refineria di Aruba (RDA) ta bende gasolin ta stacion di gasolin tin e 6% y ora e stacion di gasolin ta bende na comunidad e tin 6%, kiermen cu e impacto ta ainda mas pio.

“Nos como gobierno a tuma un decision basicamente bisando cu nos no ta haya husto cu e aumento di prijs internacional tambe ta implica cu gobierno ta cobra mas na entrada di BBO, nos a haci un propuesta despues di varios calculacion na CAft den caso aki pa wak si nos por elimina e parti di BBO y maximalisa e entradanan di gobierno, pero e conseho tabata negativo”, Wever a enfatisa.

Na e momentonan aki nan ta trahando riba otro argumentonan segun el a destaca, pa asina atrobe por yega na porta di CAft cu un argumento diferente como por ehemplo, con un bahada di prijs por causa impacto den inflacion positivamente y si ta logra baha e inflacion, kisas esey por tin un efecto positivo riba e poder di compra y yuda economia.

Di e calculacionnan cu nan ta bin haciendo, el a splica cu e situacion no ta facil unda Wever a pidi comunidad pa ta consciente di esaki “nos cada un, bao e circunstancianan aki nos ta purba di usa nos transporte na un forma responsabel, pa asina nos por controla unda nos mes por controla como nos hogar, pa asina limita e impacto riba cada un di nos”.

Pa finalisa, el a expresa cu e situacion ta fastioso y cu nan ta wak den nan opcion e oportunidad pa busca un otro tipo di gasolin.