Manera ta conoci, na comienso di februari tabata circula e noticia cu pompstationnan lo stop di bende e servicio di coriente pre-pago pa clientenan di Elmar. Esaki pa motibo cu tin cierto mal contento for di algun tempo caba door di stacionnan di gasolin pa loke ta trata nan gastonan.

Asociacion di Gasolin Dealers di Aruba (AGDA) a splica a traves di un comunicado di prensa cu e decision unanimo, pero lamentabel, cu nan a haya nan mes pa tuma dia 1 di februari 2024, no tabata un decision facil, pero si uno necesario.

AGDA ta indica cu desde 2017 pa awor e gastonan pa yuda ELMAR cu e benta di coriente pre-pago ta sigui aumenta sin cu ELMAR ta tuma nota di esaki, a pesar cu AGDA continuamente a acerca ELMAR pa discuti esaki. Nan ta señala cu mientras ELMAR continuamente ta ahusta su prijsnan a base di cu e prijs di crudo ta subi of algo otro, AGDA su miembronan no tin e luho ey pasobra ta gobierno ta dicta e margen di nan ganashi.

Den bista di esaki, diahuebs 1 di februari mediante un comunicado di prensa, ELMAR a informa cu nan a introduci un opcion di pago adicional via e app di Pay.aw di SETAR, cual tin como meta pa brinda mas conveniencia na e clientenan cu ta prefera transaccion online.

E lansamento di pago via Pay.aw tabata un introduccion di forma extra di pago, na banda di e dos formanan di pago existente cual ta na sucursal di ELMAR y na stacionnan di gasolin rond di Aruba. “E introduccion aki no tabatin como intencion pa reemplasa e otro formanan di pago existente,” e compania estatal a subraya.

PR di ELMAR, Audrey Croes a sigura na Bon Dia Aruba cu “ELMAR no a scoge pa termina e servicio di pago na gasolin stacion, AGDA a suspende e servicio aki sin notificacion previo. ELMAR a introduci un alternativa nobo di servicio di pago pa nos clientenan cu ta prefera transaccion online, e intencion tabata pa esaki bira un opcion di pago pa nos clientenan.”

Recientemente ELMAR a anuncia cu despues di busca un solucion pa e situacion tenso, specialmente pa e clientenan cu ta prefera di haci e transaccion aki personalmente y no a traves di e aplicacion, algun pompstation a reanuda e servicio di benta di coriente pre-pago, pero solamente den forma di pago efectivo.

Dialuna ultimo Minister di Economia, Comunicacion y Desaroyo Sostenibel, Geoffrey Wever a tene un conferencia di prensa na unda el a ricibi pregunta for di miembro di prensa ariba e situacion entre ELMAR y e pompstationnan y con e ta mira e hecho cu ta permiti pa usa solamente pago efectivo pa e servicio di coriente pre-pago.

E mandatario a splica cu e margen di ganashi di e doñonan di pompstationnan ta maximalisa ya cu ta Gobierno di Aruba ta bisa cuanto ta e porcentahe maximo cu nan por gana den cada transaccion. Esey ta nifica cu na momento cu gastonan subi, por ehemplo gastonan externo subi, nan no tin espacio pa aumenta nan prijs, locual na su turno ta nifica cu e aumento di gastonan externo ta come completo den nan ganashi.

Na mesun momento el a subraya cu e no por ni bisa cu ta un ganashi pasobra “nos sa cu e gasolin stacionnan no tin hopi ganashi, ta mas tanto den nan gastonan operacional esaki ta come y ta basicamente haci nan modelo un modelo negativo.”

El a señala cu den e caso aki, e banconan a aumenta nan tarifa y esey kiermen cu door cu e pompstationnan no por aumenta e prijs, nan no lo por sigui ofrece e transaccionnan a traves di carchi di banco, locual por trece caos den e mercado.

“Mi a menciona esey varios biaha y esey ta nifica cu lo bin un caos den e mercado, pasobra nos tur ta usa gasolin. Y bo ta bay haya bo cu transaccion cash y como consecuencia cu ta bin inseguridad cune pasobra tin hopi placa den circulacion. Bo por hasta pensa den direccion di atraconan, etc. E ta un situacion cu lo trece un caos si e gasolin stacionnan dicidi di no acepta carchi di banco mas,” Minister Wever a subraya.

El a bisa tambe cu segun el a scucha den medionan di comunicacion, cu ta protehando of yudando e banconan pa garantisa e stabilidad di e pomp stacion.

E mandatario a splica cu aworaki prijs a subi, por ehemplo den gasolin el a aumenta cu 8.4 cen y e aumento den e parti cu ta relata na e transaccionnan ta di 4.1 cen. Pa loke ta diesel, e prijs di esaki ta subi cu 10.1 cen, cu ta basa riba e desaroyo di prijs internacional, y e 4.1 cen ta door di aumento di tarifa di transaccion.

El a agrega cu calculacionnan a wordo haci door di Departamento di Asuntonan Economico y ora e decision “temporal” aki mester a wordo tuma y aworaki ta wak kico otro por haci.

“E ta un situacion hopi fastioso, pero nos mester a tuma e decision aki pa garantisa cu no ta bay tin caos den e mercado,” Minister Wever a indica.