Minister Geoffrey Wever ta introduci barinan nobo cu dobel capacidad den Oranjestad Un produccion local di “Metabolic Foundation”

Den un esfuerso pa mehora limpiesa y promove sostenibilidad den cuadro di e revitalisacion den e ciudad di Oranjestad, Minister Geoffrey Wever conhuntamente cu “Metabolic Foundation” pronto lo introduci un serie di barinan di sushi nobo, cu tin dobel capacidad di 100 galon cada un pa reemplasa tur e barinan existente den centro di ciudad.

Metabolic Foundation ta un organisacion local dedica na produccion di varios producto for di plastic cu nan ta colecta y recicla na Aruba. E proyecto aki ta forma parti di e esfuerso total pa revitalisa Oranjestad, cu limpiesa como un elemento integral y esencial.

Minister Geoffrey Wever ta pone enfasis riba proyectonan di alto impacto y subraya e importancia di e ambiente y creacion di un economia nobo basa riba e modelo circular. Tur e esfuersonan aki ta destina pa impulsa e economia local, demostrando un vision progresivo y sostenibel pa e futuro di Oranjestad.

Durante un bishita na e tayer di Metabolic Foundation, e mandatario a ricibi un splicacion detaya tocante e proceso di produccion di e barinan di sushi. E barinan nobo, diseña pa sostene un volumen mas grandi di desperdicio, tin como meta pa adresa e deficiencianan di e barinan actual den centro di e ciudad, cu tin capacidad chikito y ta den condicionnan malo, contribuyendo na un ambiente mas limpi y organisa. E barinan nobo ta traha di plastico colecta y recicla na Aruba.

E instalacion di e barinan nobo ta un paso importante pa conscientisa e comunidad tocante e importancia di reciclahe y maneho adecuado di desperdicio. Ademas, e ta refleha e compromiso di gobierno di Aruba pa sostene organisacionnan local den ampliacion di nan capacidad por sigui contribui na maneho di desperdicio riba nos isla. E inversion di mas cu 60,000 Florin den e proyecto aki ta beneficia e pais den conscientisacion y reduccion di desperdicio.

E introduccion di e barinan nobo aki ta un paso pa dilanti den direccion di un Oranjestad mas limpi, saludabel y sostenibel, reafirmando e compromiso pa un revitalisacion integral di e ciudad cu no solamente ta mehora su apariencia, pero tambe su calidad di bida y sostenibilidad ambiental, segun Geoffrey Wever.