Desde cu Minister Wever a tuma e carteranan di Economia, Comunicacion y Desaroyo Sostenibel, un di e visionnan tabata pa stimula un economia diversifica, inclusivo y duradero. Diaranson atardi durante e ceremonia di entrega di autonan electrico pa Departamento di Asuntonan Economico (DEACI), e mandatario a confirma cu Gobierno completo lo tuma un paso significante pa realisa esaki, cu e transicion di tur departamentonan di Gobierno pa autonan electronico.
E prome fase piloto lo cuminsa cu departamentonan bou encargo di Minster Wever mes. DEACI ya caba a ricibi e prome 4 autonan electrico. Despues lo sigui cu departamentonan manera, SEDECO, DTZ y CBS cu tambe ta den e proceso pa adkiri autonan electrico. Recientemente conseho di minister a aproba e transicion completo, y pronto lo mira transicion di otro departamentonan gubernamental manera DOW, DIP, BID, DWJZ etc.
Pa e programa bira un exito, Minister Geoffrey Wever a logra ricibi apoyo financiero di Union Europeo a traves di GO-Facility cual lo aporta cu sosten financiero (€190,000) y tecnico pa e transcision aki. Ademas, Union Europeo lo uza e proyecto piloto di Aruba como un ehempel y guia pa otro paisnan di con por uza fondonan Europeo pafo di e EU.
“Mi ta contento y agradecido na mi coleganan minister cu ta comparti mi vision pa un economia duradero,” Minister Wever a expresa. Gobierno di Aruba tin e rol di ta e ‘rolemodel’, y cu e aprobacion aki, tur departamento lo bay over na auto electrico unda cu ta posibel. Esaki lo trece un impacto positivo directo na nos comunidad y na fondonan di gobierno door di reduci gastonan cu 14% compara cu autonan tradicional segun estudionan haci. Aunke ta un fraccion di total, e reduccion di CO2 cu autonan di Gobierno ta emiti lo mehora calidad di bida y promove cuido di nos naturalesa y di mama tera. Segun e mandatario, electrificacion di transporte ta esencial pa e transicion na energia limpi. Ademas, e lo haci Aruba menos dependiente di zeta/gasolin, unda cu prijs ta fluctua hopi.
Transicion na vehiculo electronico ta aporta tambe na e Sustainable Development Goals, SDG #7; Energia Limpi y Economico, SDG #11; Barionan y Comunidadnan Sostenibel, SDG #12; Produccion y Consumo Responsabel, SDG #13; Accion riba Clima y SDG #15; Bida riba Tera. Pa cual den luna di september ta “SDG Month”.
Minister Wever a menciona cu ta spera pronto mas departamento gubernamental lo bay haci e stap pa autonan electrico, y asina demostra liderazgo y encurasha sector priva tambe pa haci e transicion aki y asina contribui na un futuro mas sostenibel pa futuro generacionnan.
