Diamars atardi, 27 di augustus, durante un evenemento ceremonial, den nomber di gobierno di Aruba, Minister Geoffrey Wever simbolicamente a traspasa e ex edificio di OM pa Fundacion Cas Pa Comunidad Arubano (FCCA), cual lo bay ehecuta e proyecto.

Parti di e vision di Minister Geoffrey Wever ta pa mas hende cuminsa biba y frecuenta den centro di Oranjestad. Pa logra esaki, e rescate di edificionan bandona den nos centro di ciudad ta esencial. “Gobierno di Aruba como propietario di diferente edificio den Oranjestad mester ta e ehempel y awe nos ta haciendo esaki”segun minister Geoffrey Wever. Solamente cu sosten di sector priva gobierno por logra trece cambionan grandi manera esun aki. Asina aki trece bek e bida cu nos tur kier mira den Oranjestad.

“Mi ta sumamente orguyoso cu awe nos por firma e traspaso di e edificio di ex-OM cu FCCA,” Minister Wever a cuminsa ta bisa”. E iniciativa specifico aki ta forma parti di un esfuerso di mas cu 2 aña y awe nos ta wak e frutonan amplio den revitalisacion e centro di Oranjestad. Poco poco nos lo trece bida bek den centro di nos capital.”

FCCA lo bay converti ex edificio di OM den 19 vivienda pa studiante cu lo brinda e posibilidad na tur esnan interesa di establece nan mes den centro di ciudad den un espacio nobo y accesibel pa tur studiante. Den e mesun edificio aki lo acapara 3 espacio comercial den cual diferente tipo di actividad comercial ta proyecta pa bini. Un inversion di FCCA di aproximadamente 4.5 miyon Florin.

Minister Wever ta comprometi pa revitalisa e curason di nos capital, y transforma espacionan bandona den oportunidadnan nobo pa desaroyo economico. Oranjestad ya por conta cu diferente edificionan renoba manera esunnan di Aruba Fair Trade Authority(AFTA) un entidad nobo cu Minister Wever a establece na Aruba pa garantisa comercio husto y di calidad. Alabes, a muda FREEZONE tambe den Caya Grandi. Na comienso di e aña aki a cuminsa cu renobacion di Cas Veneranda unda lo bay bira e cas nobo di Departamento di Asuntonan Economico cu tambe ta resorta bao di Minister Wever. Cumpliendo asina cu su compromiso pa trece tur departamentonan cu ta resorta bao di dje den nos centro di ciudad. Departamentonan di gobierno BIE y SEDECO tambe ta den proceso pa muda den november den edificio di ex-Interbank, mientrastanto tin combersacionnan andando referente e futuro desaroyo di e warda di polis na Wilheminastraat cual actualmente ta bandona y mester ser rescata, segun minister Wever.

Comienso di Wilhelminastraat a haya un facelift y pronto lo cuminsa cu Fase 3 cu ta situa den area di Lagoen caminda lo amplia parkeo rond di area y lo instala den cooperacion cu N.V. Elmar, “charging stations” pa autonan electrico. Mientrastanto ta ehecutando un ciere di proyectonan grandi ta sigui cu instalacion di luznan nobo y barinan di desperdicio, mantencion di vegetacion y planta nobo caminda tabata necesario.

“Oranjestad a haya su debido atencion durante e ultimo añanan y nos ta consciente cu tin mucho mas pa haci pa por hiba nos ciudad back na su gloria. Sinembargo, tur esfuersonan haci ta un muestra di nos compromiso pa duna contenido na nos vision di revitalisa Oranjestad, y nos ta agradecido y ta contento pa mira cu e ta dunando su frutonan.”