Riba 24 di mei, minister Geoffrey Wever, presidente di Kamer van Koophandel Gavril Mansur, Departamento di Asuntonan Economico, Comercio y Industria y representantenan di ministerio di salubridad a reuni cu sra. Ana Milena Cortazar representatante di Asociación Nacional de Empresarios de Colombia miho conoci como ANDI.
ANDI ta un organisacion priva cu ta representa e interes di e comerciante Colombiano y tin 1450 miembro. E contribucion di comerciantenan di ANDI na e economia di Colombia ta 50% di e GDP of producto interno bruto. Cu mas di 80 aña di existencia ANDI ta fungi como e bosero pa promove y defende interes di su miembro nan, facilitando negoshi y yuda resolve “bottle-necks” caminda por.
Desaroyo sostenibel of sostenibilidad ta importante pa ANDI como representante comerciantenan. Pa 2030 ley di Colombia ta exigi tur empresa cu ta activo na Colombia pa recicla minimo 30% di tur producto cu nan ta produci (bende) na Colombia, y ANDI ta un partner importante pa segura cu logra e meta aki. Pa 2050, e intencion ta pa Colombia su emision di CO2 ta “carbon-neutral”. Actualmente tin mas di 50 empresa cu ta forma parti di ANDI cu a compromete pa sea crea, exporta of uza hidrogeno como fuel. Riba e tereno di desaroyo sostenibel, ANDI tin 8 projecto piloto den ehecucion. Un di projectonan ta e projecto piloto na Bogota pa introduci busnan cu ta hasi uzo di hidrogeno.
“ANDI por ta un partner importante pa logra metanan comun entre Aruba y Colombia, y nos ta sumamente agradecido pa e reunion fructifero cu ta habri e caminda pa facilita mas comercia pa Aruba”, segun minister Geoffrey Wever. E oportunidadnan pa colabora hunto mester ser explora.
Minister Geoffrey Wever ya a concorda cu lo organisa reunionnan virtual hunto cu ANDI y gremionan comercial di Aruba pa asina por siña for di otro, sostene otro, y promove colaboracion pa futuro. Tambe lo plania virtual business match-making entre diverso companianan representa pa ANDI, pa haci miho uzo di e momentum genera por medio di e Trade Mission.
