Minister Geoffrey Wever: Proteccion di consumidor ta fundamento di un economia duradero

Recientemente Minister di Asuntonan Economico, Comunicacion y Desaroyo Sostenibel, mr. Geoffrey Wever, a ricibi bishita di mr. Dr. Carlos Bollen di Universidad di Aruba pa un intercambio di idea over di proteccion di consumidor.

Vision di ministerio di Asuntonan Economico, Comunicacion y Desaroyo Sostenibel ta un consumidor consciente y critico. Pa garantiza e meta aki ta esencial proteha derechonan di consumidornan.

Den un intercambio ameno, minister Geoffrey Wever y Sr. Carlos Bollen a elabora riba con na un manera efectivo lo duna contenido na e proteccion legal di e consumidornan riba termino corto y largo. Meta primordial ta pa e consumidor ta informa di su derechonan. Banda di e rol di gobierno den e proteccion legal di consumidor tambe a papia over di e importancia di tin un Consumentenbond den practica pa por enforsa activamente e derecho di consumidor.

Minister Geoffrey Wever kier a gradici Sr. Carlos Bollen pa su bishita y ta spera di por sigui conta cu su experticio riba proteccion di nos consumidornan.