Aruba como economia chikito ta importa mayoria productonan cu cada un di nos ta cumpra den supermercado of tienda. E productonan ta yega Aruba via barconan o avionan di diferente paisnan y ta destina pa produccion y consumo local of exportacio via Freezone.

Minister di Asuntonan Economico, Comunicacion y Desaroyo Sostenibel, mr. Geoffrey Wever, ta informa cu Oficina Central di Estadistica a publica infomacion di cifranan di importacion y exportacion pa e prome kwartaal (“Q1”) di 2023.

Den e prome kwartaal di 2023, e balor di productonan importa tabata Afl. 659 miyon. Di e suma aki, Afl. 623 miyon ta destina pa produccion y consumo local y Afl. 36 miyon pa exportacion via Freezone. E peso total a yega un total 163 miyon kilo di cual 161 miyon kilo ta pa produccion y consumo local y 2.5 miyon kilo pa exportacion.

E data ta mustra un subida compara cu Q1 di 2022 den e balor y peso. E balor di importacion total a subi cu 94 miyon Florin, y e peso total a subi cu 3.5 miyon kilo. Den e Q1 di 2022 e balor di importacion y peso tabata respectivamente 565 miyon florin y 160 miyon kilo. E Q1 di 2023 tambe ta mustra un subida compara cu e Q1 di 2019, den balor y peso. Esaki ta un indicacion di e recuperacion economico di Aruba. Den e Q1 di 2019 e balor di importacion y peso tawata respectivamente 534 miyon florin y 155 miyon kilo.

Analisis ta mustra cu e balor di importacion a subi cu 25% compara Q1 di 2019, mientras den peso a subi cu solamente 3%. Esaki ta un indicacion fuerte cu aunke nos ta importa un tiki mas den peso, e balor di importacion a subi relativamente mas halto door di e impacto di prijsnan halto/subiendo internacionalmente.

E productonanan alimenticio tabata e segmento mas grandi cu un balor di 60 miyon den e total. Den esaki e top 5 di productonan tabata tipo di pan sin sucu etc., saus y preparacion pa saus, bebidanan sin alcohol, cerbes y biña di grape fresco.

Ministerio di Asuntonan Economico, Comunicacion y Desaroyo Sostenibel ta monitor continuamente desaroyo di importacion y exportacion di productonan y su impacto riba economia di Aruba. Pa mas informacion over di cifranan di importacion y exportacion di nos pais por bishita e website www.cbs.aw