Den luna di februari 2023, Economisch Bureau Amsterdam a cuminsa cu un estudio, financia pa minister Geoffrey Wever, riba e impacto economico di “AirBnB” na Aruba. Door di falta di informacion y maneho riba “vacation rental” priva, Minister Geoffrey Wever algun luna pasa a haya aprobacion di Conseho di Minister pa asina cuminsa e estudio aki. E promer fase a keda cla y recientemente e mandatario a ricibi for di Economisch Bureau Amsterdam e resultado di e estudio aki.

E necesidad pa e estudio aki ta basa riba e hecho cu cada cas cu wordo ofreci como “vacation rental” ta nifica cu tin menos cas pa nos propio localnan. E cantidad di casnan pa localnan ta baha door cu personanan cu no ta biba na Aruba ta cumpra casnan den zona residencial cu e meta di hasi esaki un “AirBnB”. Cu menos cas obtenibel door di e desaroyo aki pero cu un demanda grandi pa cas, e prijs pa cas ta sigui subi y bira impagabel pa nos mesun hendenan. Tambe cada cas cu wordo ofreci como “vacation rental” ta nifica cu eherce un actividad economico of negoshi, pa cual mester cumpli cu tur rekisitonan legal. Falta di cumpli cu ley ta crea competencia inhusto cu un impacto negativo riba nos economia.

“Ta nos deber como gobierno pa percura cu tin un balans husto”, segun Minister Wever. Maneho economico y desaroyo sostenibel di minister Geoffrey Wever ta basa riba stimula comercio, stimula competencia husto y stimula participacion di tur ciudadano den desaroyo di Aruba, den cual cada persona por participa y logra su metanan. Cada negoshi mester por florece pero semper cumpliendo cu tur rekisitonan. Cada local mester por logra yega na su propio cas.

Awor cu e estudio riba e impacto economico di “AirBnB” na Aruba a wordo finalisa, ta necesario den cuadro di transparencia, presenta e resultado di e estudio aki na tur stakeholders. Lo duna stakeholders e oportunidad pa duna nan reaccion por escrito pa asina por tuma esaki den consideracion ora cu e beleid wordo traha. “Nos kier ta sigur cu ora e beleid ta cla, tur stakeholders a haya oportunidad pa duna nan input y cu e beleid ta uno cu lo haya acceptacion y lo ta uno husto y inclusivo”, segun Minister Wever.

P’esey Minister Geoffrey Wever ta invita miembronan di prensa y interesadonan pa asisti na e presentacion di e resultado di e estudio pa midi e impacto economico di Vacation Home Rentals na Aruba. Economisch Bureau Amsterdam, despues di a finalisa y entrega e rapport final, lo duna un presentacion virtual di e resultado na stakeholders, prensa y publico.

E presentacion di e resultado di e estudio lo tuma lugar riba 22 di mei 2023 di 11:00 AM pa 01:00 PM den Aula di Universidad di Aruba.