Den cuadro di e meta pa diversifica economia di Aruba y crea un desaroyo mas sostenibel, minister Geoffrey Wever a ricibi un presentacion di parti di Metabolic Foundation. Den e presentacion Metabolic Foundation a comparti e plan pa sondea oportunidadnan pa Aruba den e mercado di carbon trading.
E proyecto ta lidera pa sra. Christie Mettes, experto den diferente tema relaciona cu sostenibilidad. E proyecto lo haci uzo di “remote sensing” pa estima cuanto oportunidad di captura carbon dioxide (CO2) tin na Aruba den diferente areanan. Tambe lo analisa e diferente metodonan cu tin potencial pa spaar of reduci CO2 por medio di diferente tecnologia cu tin actualmente pa energia renobabel.
E resultado di e analisis lo estima cuanto carbon lo por spaar den un periodo a termino largo y cuantificando esaki lo duna un indicacion di e balor cu e CO2 lo por tin riba mercado boluntario internacional.
Na 2021 e mercado internacional tabata tin un balor di 1 biyon USD y ta premira di lo por yega un balor di 15 biyon na 2030. E mercado aki ta hayando mas y mas atencion door di sistemanan obligatorio y boluntario cu companianan ta forma parti di dje. E sistemanan aki tin como meta pa cumpli cu e Acuerdo di Paris di baha nivelnan di CO2 mundialmente.
Manera a wordo comparti anteriormente, compra y benta di carbon credits ta pasa entre negoshinan cu ta buscando pa cumpra CO2 paso nan ta den un structura legal cu ta obliga nan di baha nan emision di CO2 gradualmente. E benta y compra di CO2 por tin hopi beneficio financiero pa Aruba, unda e ganashi por wordo uza pa inverti den proyectonan sostenibel. Proyectonan manera di solar panels y asina baha costo di bida.
E proyecto aki ta un esfuerso pa explora modelonan economico nobo cu lo por diversifica entradanan pa pais Aruba. E estudio lo wordo finalisa den un termino di dos luna, unda lo comparti e resultadonan y consehonan cu pueblo di Aruba. Abase di e resultadonan lo determina e siguiente pasonan di accion.
