Despues cu den luna di juni a cuminsa cu limpiesa di caya grandi y instalacion di barinan di sushi den nos centro di cuidad, nos ta sigi cu instalacion di 100 lus adicional y asina contribui positivamente na e seguridad den nos centro di cuidad segun Minister Geoffrey Wever. Un inversion di mas cu 200 mil florin den nos centro di cuidad.
Tur inversionan adicional pa nos centro di cuidad ta parti di un strategia holistico pa revitalisa Oranjestad. Na final hasi centro di nos cuidad comercialmente mas viabel.
Esfuersonan di revitalisacion no ta limita solamente na caya grandi. Wilhelminastraat y Columbusstraat tambe ja a haya atencion special mirando cu aunke Oranjestad pa añanan no tabata den su mehor momento, e area aki a sa di crece organicamente den un “cluster culinario”. Na Wilhelminastraat, nos a traha riba renovacion di area, cu instalacion di mas iluminacion, creacion di espacio pa arte “urbano”, ariba e plaza nobo, esta Plaza Comercio.
E area lo mester bira un centro di actividad comercial y recreativo, atrayendo tanto residente como turista.
Na Columbusstraat, nos a amplia e espacio pa peaton y instala mas mata y iluminacion asina crea un ambiente mas agradabel. Revitalisacion di Oranjestad ta inclui tambe e restauracion di edificio historico, preservando e herencia cultural di nos isla mientras ta propaga un desarroyo “urbano” sostenibel. Ehercicionan, cu cual nos ta busca na halsa e experiencia di tur cu ta pasa nan tempo na Oranjestad, hasiendo e centro di cuidad un destino di preferencia pa compras, recreacion y experiencia cultural.
Minister Geoffrey Wever, ta enfatisa cu e obhetivo principal ta pa crea un ambiente sigur, atractivo y dinamico pa comunidad y bishitantenan, mientras ta sigura cu e crecemento y desarroyo ta sostenibel y na beneficio di futuro di nos isla.
