Ayera mainta durante conferencia di prensa di gobierno Minister di Asunto Economico, Comunicacion y Desaroyo Sostenibel, Geoffrey Wever, a brinda un actualisacion pa loke ta e proyecto di Wilhelminastraat y Columbusstraat y e proyecto di iluminacion di Oranjestad, y a elabora ariba e vision cu Ministerio di Asunto Economico, Comunicacion y Desaroyo Sostenibel tin pa centro di Oranjestad.

Pa loke ta e proyecto di Wilhelminastraat y Columbusstraat, manera ta conoci caba siman pasa diabierna e caminda a habri back y e proyecto ta casi cla. Minister Wever a indica cu segun estimacion, pa e siman aki e proyecto lo wordo entrega completamente, mirando cu ainda falta e banda di e trottoirnan den e banda di Wilhelminastraat.

El a remarca cu aworaki cu e proyecto ta terminando e ta spera cu e comerciantenan cu lamentablemente a sufri durante e proceso di construccion pa motibo cu tabatin un tardansa adicional por recupera e perdida cu nan a ricibi den e ultimo lunanan pa motibo di e restraso den e proyecto.

Manera ta conoci durante e construccion di e proyecto tin tubonan bao di tera di rioleering cu a kibra cu a causa un retraso basta grandi y esaki a pone cu e proyecto a tarda mas di loke tabata e plan original.

Minister Wever a splica cu na momento cu a diseña e proyecto e tabata consisti di dos fase. E prome fase ta e parti di Columbusstraat y Wilhelminastraat y e di dos fase ta bira e parkinglot completo te cu lagoen pa asina amplia esaki cu mas luga pa parkeer, cu mas luz pa asina tin mas visibilidad.

El a informa cu diabierna awo e contratistanan lo entrega nan oferta pa e di dos fase di e proyecto pa asina por scoge e contratista cu lo gana y cu lo ta encarga cu ehecucion di e di dos fase aki.

El a agrega cu e fondonan pa e fase aki ta aproba caba y na comienso di januari e proyecto aki lo cuminsa.

Minister Wever a indica tambe cu manera ta conoci algun siman pasa Ministerio di Asunto Economico, Comunicacion y Desaroyo Sostenibel a anuncia e competencia pa nombra e plaza na Wilhelminastraat y Columbusstraat.

“Nos ta desea pa e haya un nomber apropia y pa e motibo ey nos a haci un concurso unda tur ciudadano por a participa y duna nan contribucion cu nombernan cu nan ta kere ta apto pa e plaza aki,” el a señala.

Segun el a indica nan a ricibi mas di 250 registracion y nombernan cu ta bin dilanti mas frecuentemente lo bay pa e comision encarga cu e nombramento di e plaza pa asina den januari pa dilanti por haci e acto oficial caminda ta desvela e nomber pa e plaza nobo aki.

Pa loke ta e proyecto di iluminacion di Oranjestad, Minister Wever a recorda cu recientemente a anuncia cu lo cuminsa cu instalacion di 50 luz den centro di Oranjestad, specialmente den caya Betico Croes.

E luznan aki ya caba a wordo instala y ta funcionando caba. El a agrega cu mirando cu nan a ricibi feedback positivo di diferente comerciante, nan a tuma nota cu esaki ta un punto hopi importante pa desaroyo di centro di ciudad. Pa e motibo ey Ministerio di Asunto Economico, Comunicacion y Desaroyo Sostenibel a tuma e decision pa wak cuanto luz mas lo falta pa tin full e area ilumina di un forma nobo y, segun e minister ta indica, a resulta cu 100 palo di luz adicional ta necesario pa ilumina full e area.

Durante e ronda di pregunta, un miembro di prensa a puntra e minister cu mirando e retraso cu tabatin durante e prome fase di e proyecto di Wilhelminastraat y Columbusstraat, kico ta sigura cu no lo tin un retraso atrobe durante e di dos fase.

Contestando e pregunta, Minister Wever a splica cu e retraso di e proyecto tabatin di haber cu e tubonan di rioolering den Columbusstraat cu a kibra durante e construccion y cu tabata trata di sistemanan bieu.

El a sigui splica cu locual nan a compronde di DOW ta cu caminda cu ta bay realisa e construccion pa e di dos fase di e proyecto aki, no tin e tipo di tubonan ey bao di tera.

“Nos ta spera cu e di dos fase por wordo ehecuta sin ningun retraso. Naturalmente ta bay ta extra cauteloso y p’esey nos ta bay parti’e tambe. Ta bay cuminsa cu e parti di e parkinglot prome y despues haci e parti di Wilheminastraat pa asina e high season por pasa un poco pa no stroba e comerciantenan. Ta bay tin en todo caso un miho comunicacion cu e comerciantenan den e area,” el indica.

Pa loke ta revitalisacion cu kier trece den e area di e centro di ciudad, un miembro di prensa a puntra e minister di tin combersacion cu e comerciantenan tambe pa cambia e modelo di negoshi cu ta tuma luga den e area aki.

Minister Wever a splica cu e vision cu Ministerio di Asuntonan Economico tin ta pa tin un centro di ciudad unda hende ta biba. El a señala cu ariba tin hopi espacio bashi y nan ta kere e espacionan por bira apartamento of Airbnb.

El a agrega cu tin tambe e parti di horeca cu nan kier enfoca hopi riba dje. “E vision ta cu centro di Oranjestad ta bira un centro gastronomico y ya desde aña pasa ora a anuncia e proyecto di Wilhelminastraat y Columbusstraat ta pa e sigui e proceso pa e bira un capital culinario di mundo y p’esey a dicidi di embeyece e area unda e restaurantnan ta uni caba. Esey ta e combinacion cu nos kier busca,” el a señala.