Tur diasabra STR Agriculture ta patronisa un Farmer’s Market, ubica na nan sitio na Alto Vista, Noord. Aki a cera colaboracion entre diferente entrepreneurnan agricola (agripreneurs) local pa brinda nan un plataforma pa nan por bende nan productonan. Minister di Asuntonan Economico, Geoffrey Wever, tabata tin e grato placer di por a bishita e Farmer’s Market.
STR Agriculture mes ta produci diferente tipo di fruta y berdura a traves di sistemanan tradicional y tambe moderno di cultivacion. Nan productonan ta ser bendi localmente cu industria di F&B, como tambe cu algun supermercadonan, y obtenibel na nan Farmer’s Market.
Minister Wever a keda impresiona cu e facilidadnan di green house actualmente den uzo, y tambe cu planificacion pa añadi un green house grandi nobo, specialmente diseña pa sistema di cultivacion moderno. Ta aplaudi e confiansa di e empresarionan den e economia local, y nan compromiso pa contribui na esaki a traves di inversion den e industria.
Colaboracion ta necesario pa sostene especialmente agricultornan chikito. Minister Wever ta keda enfatisa cu e sector di agricultura tin e potencial di bira un sector economico importante cu por contribui na e diversificacion di nos economia local. Cu esfuersonan di gobierno andando manera e.o. Agri Business Academy, un iniciativa di Minister Arends, Minister Wever y Qredits, ta demostra nos compromiso pa stimula empresarionan den sector agricola pa nan por sigui opera exitosamente, alaves atrae mas interes y inversion local den e industria.
Minister Geoffrey Wever ta aplaudi e colaboracion entre STR Agriculture y empresarionan chikito, tur na beneficio di economia, agricultura y desaroyo sostenibel di Aruba. Un palabra di gradicimento na STR Agriculture pa e invitacion.
