Recientemente minister di asuntonan economico, comunicacion y desaroyo sostenibel, Mr. Geoffrey Wever tabata tin un reunion fructifero hunto cu embahador di Reino Hulandes na Caracas, Venezuela, esta S.E. Robert Schuddeboom.
Entre otro a combersa riba temanan economico, manera e relacion di comercio entre Venezuela y Aruba, pa cual recientemente a reanuda trafico maritimo entre e dos paisnan. Aruba ta midiendo un impacto positivo mirando e cantidad creciente di productonan – specialmente di nutricion basico – cu ta ser importa for di Venezuela desde cu a habri frontera maritimo.
Tambe a elabora riba e exito y follow-up di e “Trade Mission” recientemente pa Colombia. Mester subraya cu Embahada di Reino Hulandes a hunga un rol importante den haci esaki un exito y un biaha mas a mustra nan disponibiladad pa sigui traha hunto na beneficio di Pais Aruba. Relacionnan bilateral cu paisnan bisiña ta keda importante y ta forma parti importante di minister Wever su maneho. “Nos mester mantene cooperacion economico saludabel entre paisnan bisiña. Aruba riba su mes como un pais chikito ta hopi dependiente di otro paisnan pa comercio”, segun e mandatario
Minister Geoffrey Wever ta agradecido pa e bishita di embahador Schuddeboom, y ta agradecido na e disponibilidad desplega di parti embahada di Reino Hulandes asesora pa mehora lasonan bilateral economico y comercial, y resolve cualkier retonan di logistica cu por existi, pa asina promove comercio. A finalisa na cuminsa elabora riba e posibilidad pa un trade mission pa Venezuela, siguiendo e exito di e mision comercial recien.
