Diahuebs 1 di december, e prome symposium di Aruba Fair Trade Authority (AFTA) a tuma luga. E symposium a wordo organisa door di e ekipo di implementacion di AFTA. E tematica di mehoracion di concurencia ta parti di maneho di Minister di Asuntonan Economico, mr. Geoffrey Wever, y ta resorta tambe bou di su responsabilidad politico.
Ta importante pa subraya cu responsabilidad di e minister ta pa bin cu e sistema pa mehoracion di concurencia, pero cu e contenido di e sistema ta den man di AFTA cual ta un organo independiente cu un mesun directiva y conseho di supervision y lo opera independientemente di gobierno.
Aruba Fair Trade Authority ta na beneficio di e pueblo di Aruba completo; pa consumidor y comerciante. Investigacion internacional a mustra cu reglanan di concurencia ta aporta na hacimento di negoshi y na clima di inversion di un pais. Miho competencia ta contribui na miho prijs, miho servicio y miho producto. Ta importante pa comerciante y consumidor compronde con e autoridad independiente di competencia husto lo funciona den practica, pa cual motibo a organisa e symposium.
“Mayoria pais na mundo tin un autoridad di competencia. Awo Aruba tambe ta forma parti di e desaroyo internacional importante aki. Miho competencia ta den beneficio di e ciudadano”, minister Geoffrey Wever a subraya.
