Durante e presentacion di Presupuesto 2023 Minister Geoffrey Wever a elabora ampliamente riba e efecto di desaroyo di prijsnan internacional riba e nivel di prijsnan di servicio y productonan na Aruba.
Subida di prijsnan di servicio y productonan of inflacion ta un topico di tur dia, door di su impacto riba nos cartera. E dependencia grandi di Aruba riba importacion di productonan ta nifica cu nos ta importa tambe e subida di prijsnan internacional. Esaki ta nifica cu nos productonan ta bira mas caro cu un caida den poder di compra como resultado.
Den e ultimo proyeccion over con nos economia lo desaroya, Departamento di Asuntonan Economico ta premira un inflacion di 5.6% na 2022 y na 2023 un inflacion di 5.4%. E proyeccion aki ta basa riba un analisis profundo di e ultimo desaroyonan internacional y nacional door di nos expertonan.
Durante e tratamento di presupuesto 2023 minister Geoffrey Wever a elabora na un manera amplio riba e impacto economico di introduccion di BTW compara cu un subida di tarifa di BBO. Diferente estudio haci a base di peticion di Gobierno di Aruba a demostra cu un subida di e tarifa di BBO cu 1.0% lo tin un impacto di 1.4% riba inflacion compara cu e impacto di BTW cual ta entre 5.3% te cu un “worst-case-scenario” di 9.9% cu un tarifa di BTW di 6% y 14%.
Estudionan a demostra cu e impacto riba nos prijsnan di producto y servicio ta depende parcialmente riba e decision di comerciantenan; si nan ta kita prome e BBO y a base di e prijs aki – sin BBO – ta aplica e tarifa nobo. Si no kita e BBO prome y aplica e tarifa nobo, ta premira cu esaki lo resulta den un inflacion mucho mas halto.
Desaroyo internacional di prijsnan y e espacio di comerciantenan lo influencia e decision si lo ahusta e prijsnan pa e consumidor. Den un scenario unda cu comerciantenan no kita e BBO prome, asina yama un “worst case-scenario”, e impacto di BTW riba inflacion lo ta 9.9%. Den e scenario cu comerciantenan ta kita e BBO prome, e impacto di BTW riba inflacion lo ta 5.3%. Esaki ta e rango, den teoria, pero e realidad lo ta entre 5.3% y 9.9%. Expectativa ta cu algun comerciante si, y algun no lo kita e BBO prome.
E realidad ta keda cu Gobierno di Aruba tin gastonan – entre otro di interes di debe – cu e mester cubri. Aki a bin cu e recomendacion cu lo mester subi BBO cu 1%. E calculacionnan a ser haci y ta indica cu subida di BBO cu 1% tin efecto inflatorio hopi mas abao di solamente 1.4% adicional.
Minister Wever a declara cu a base di e estudionan aki, y e situacion actual, cu gobierno a haci un decision responsabel y prudente, y ta para tras di e decision aki tambe.
