Minister Geoffrey Wever ta implementando e proyecto ‘Sistema Nacional di Estadistica (Nationaal Statistisch Systeem (NSS)). Un NSS tin diferente beneficio pa un pais. E NSS ta produci estadisticanan oficial pa un audiencia grandi: publico en general local y internacional, sector priva, mundo academico, studiantenan, parlamento y gobierno.
Pa e NSS por wordo implementa, mester di un ley amplio. Den cuadro di esaki awe, riba peticion di minister Geoffrey Wever, conseho di minister a aproba un acuerdo di trabou cu un compania di wetgeving Hulandes pa juda Aruba den traha e ley pa cu e NSS. Pa e proceso cana di manera mas efectico a kies pa laga un compania haci e trabou aki mirando cu Directie Wetgeving en Juridische Zaken tin hopi trabounan ta haciendo y e trabou pa crea e ley pa e NSS ta un trabou grandi pa cual experticio specifico ta rekeri.
A tene un destaho y a invita tres compania pa duna un oferta pa traha e concepto di ley di NSS. For di e companianan a scohe e compania concerni mirando cu esaki tabatin un mihor oferta. E compania lo cuminsa cu e trabounan y lo traha hunto cu Directie Wetgeving en Juridische Zaken. E intencion ta pa entrega e concepto di ley di NSS pa fin di september na Raad van Advies.
E NSS ta un cooperacion entre Oficina Central di Estadistica (Centraal Bureau Statistiek (CBS)) y otro productor di estadistica oficial cu e meta di garantisa produccion di un gran variedad di estadistica oficial di calidad halto, relevante y actual pa asina esaki por forma e fundamento di formulacion y evaluacion di maneho y di desaroyo sostenibel.
“NSS ta un tool importante pa tur hende, tanto den rol como ciudadano y tambe den rol profesional. Datos confiabel ta importante pa tin un pueblo bon informa. E NSS lo contribui tambe na bon gobernacion por medio di maneho mas responsabel: ora gastonan di gobierno tin datos confiabel como base, e fondonan di gobierno ta wordo usa mas efectivamente. Esaki ta evita malgastamento di fondonan di gobierno, dus mas reduccion di gasto”, minister Wever a comenta.
