E estudio pa midi e impacto economico, social y pa sociedad di e desaroyo den e cantidad di cas pa local na Aruba ta den pleno ehecucion. Minister Geoffrey Wever a anuncia esaki e estudio aki luna pasa pa investiga e.o. cuanto di nos ciudadanonan ta doño di nan propio cas y cuanto di e casnan na Aruba ta wordo usa como cas pa biba so, y cuanto cu un meta comercial.
Banco Central di Aruba su estudio titula “A hedonic regression analysis of house asking-prices in Aruba” na 2020 ta mustra cu e prijsnan pa casnan na Aruba a subi cu un averahe di 2% cada aña den e delaster 7 añanan. E cantidad di camber, e grandura di construccion y e presencia di servicionan ta segun e estudio menciona, e factornan tras e subida di e prijsnan di casnan.
E subida di e prijsnan di cas ta uno preocupante pasobra casnan ta bira impagabel pa nos ciudadanonan. E desaroyo aki ta stroba nos di logra e meta di un sociedad inclusivo den cual cada persona por participa y logra su metanan. Cada local mester por yega na su propio cas.
P’esey e urgencia pa ehecuta e estudio pa midi e impacto economico y social pa sociedad di e cantidad di casnan disponibel na Aruba. Economisch Bureau Amsterdam actualmente ta hasi e estudio aki. Parti di esaki ta pa duna tur stakeholders e oportunidad pa duna nan contribuicion na e estudio aki. P’esey Economisch Bureau Amsterdam lo traha den cooperacion estrecho cu entre otro Aruba Tourism Authority, Centrale Bank van Aruba, Centraal Bureau voor de Statistiek y Vacation Rental Owners Association. Esaki ta importante ora di traha y implementa un maneho economico. Ta premira cu pa fin di maart Economisch Bureau Amsterdam lo entrega e rapport final.
Desaroyo economico ta trece banda di beneficio pa nos pais tambe retonan cu un impacto riba e calidad di bida di nos ciudadanonan. “Mi ta sigur cu e estudio importante aki lo duna su contribuicion pa hunto traha un maneho duradero y inclusivo, pa subi calidad di bida di nos ciudadanonan”, segun minister Geoffrey Wever.
