Desde inicio di gobernacion Minister Geoffrey Wever y Departamento di Asuntonan Economico, Comercio y Industria (DEZHI) tabatin e meta pa mehora e proceso di habri un negoshi na Aruba.
Asina aki hopi instancia experimental a bay over na digitalisacion unda cu e cliente no tur ora mester acudi personal, pero por regla hopi cos online. Asina aki DEZHI a conduci un encuesta (survey) pa haya sa con satisfecho cliente nan ta cu e servicio brinda personal y digital di DEZHI relaciona cu vestigingsvergunningen, pues permisonan pa negoshi.
Por nota cu tur esnan cu a participa na e survey aki alrededor di 80% ta satisfecho cu e servicio brinda como tambe e experencia di haya e informacion nan debido via e website di DEZHI, segun a informa den un comunicado di gobierno.
Door di e digitalisacion tambe awor DEZHI ta duna permisonan hopi mas rapido. Awor un comerciante por tin su permisonan ya caba den 2 pa 4 siman dependiendo di e complehidad di e peticion/bedrijfsactiviteit/doelstelling of cantidad di directornan.
DEZHI lo bay keda haci survey nan asina pa keda monitor y mehora nan servicio unda cu mester.
“Mi ta contento di por tende cu e proceso di digitalisacion ta dunando su fruta nan,” Minister Wever a cuminsa ta bisa den e comunicado. “Parti di vision di nos Ministerio ta pa nos minimalisa red tape y optimalisa e servicio pa hacie mas facil pa haci negoshi aki na Aruba.”
