Durante weekend, Minister Ursell Arends y Minister Endy Croes a cende luznan y corta sinta pa asina simbolicamente habri Caya Grandi oficialmente back automobilistanan, pa un periodo di 4 luna.
Esaki a ser palabra despues di un reunion entre Minister Arends y Minister Wever cu un grupo di comerciantenan di caya grandi algun siman anterior. Den e reunion comerciantenan a haci un peticion pa habri nos caya grandi back pa automobilistanan.
Segun un comunicado di prensa, minister Wever y Minister Arends no a sinta keto y a duna oido na e comerciantenan, cual nan peticion a ser presenta y aproba den conseho di minister.
“Nos ta hopi contento awe di por habri caya back pa nos automobilistanan”, Minister Arends a cuminsa ta bisa. “Mi mes ta corda tempo nan ‘ya mi tabata pasa cu mi mayornan y wak kico tur caya tin di ofrece for di bentana di auto. Sigur momento nan placentero cu nunca mi lo lubida. Awe e recuerdo nan aki por wordo treci atrobe.”
E tram su ruta a ser adapta, y lo bay te Plaza Daniel Leo bin back abao. Aki lo baha turistanan y nan pasaheronan pa asina por bay den nos Caya Grandi. Ta deliberando con lo coordina pa acomoda pa haci e ruta di tram te fin di caya riba fechanan cu tin crucero, manera ta custumbra. Esaki lo bay den deliberacion cu Aruparking, comerciantenan di Caya Grandi y e Ministerionan concerni.
Minister Wever ta duna di conoce cu “esaki ta e solamente un paso pa cambionan structural cu tin plania den nos centro di ciudad y pa asina trece bek e ambiente y fluho di hende.”
Pronto ministerio di asuntonan economico lo haci diferente anuncio, incluyendo actividad pa fin di aña pa asina por pasa dushi temporada di fiesta den centro di ciudad. Un invitacion ta bay pa henter pueblo pa bin cu bo auto pasa den Caya Grandi y asina admira tur loke tin pa ofrece, y tambe presencia un ambiente amplifica.
