“Ideanan economico ta sali for di mentenan creativo, pero nan mester wordo inspira”

Ayera San Nicolas tabata di fiesta cu e lansamento oficial di YES! San Nicolas Summit, na unda minister di Asuntonan Economico, Comunicacion y Desaroyo Sostenibel, Geoffrey Wever a haci un presentacion di e proyecto dirigi pa e hobennan di e districto aki.

Minister Wever a splica cu esaki ta un presentacion pa hobennan cu den nan expectativanan tin pa den futuro nan por bira doño di nan mesun empresa, cu ta mira e potencial economico di e area aki di e isla, ta p’esey cu nan a dicidi di organisa un evento di dos dia.

Cu esaki basicamente ta bay yuda nan haya inspiracion, mustra nan e oportunidad cu tin. A scoge un evento di dos dia cu diferente orador, como Hans Hoornstra cu ta autor di “Digital Inteligence”, kende ta bay splica e hubentud con pa haci negoshi den e era digital. Tambe nan a invita Tristan Every, kende ta un empresario hoben local cu diferente idea y diferente empresa. E di dos dia di evento aki lo ta mas dirigi riba e parti di interactivo caminda nan lo organisa diferente brainstorm sessions unda lo laga e hubentud participa den diferente tayer.

Cu “Young Entrepeneur Summit ‘YES”’ no solamente nan kier informa e hobennan di un banda, sino cu tambe nan lo participa activamente y siña hermentnan, segun minister Wever a sigura, unda cu despues di e evento aki nan ta bay cu hermentnan pa dia di mañan ora cu nan kier ta un empresario.

“Nos ta pensa cu e area di pariba di brug tin un potencial economico grandi y nos ta kere cu e añanan nos dilanti e area aki ta area di desaroyo economico pa nos isla”, minister Wever a sigura.

Igualmente el a enfatisa cu mester crea lidernan nobo y pa haci esey mester inverti den nan y inspira nan. Pa e motibo aki nan a dicidi di organisa e cumbre aki, cu ta un proyecto diferente di e otro proyectonan cu nan tin, pero cu esaki ta e principio pa por comprometi cu nan, pa scucha nan idea, “pasobra hopi biaha ideanan economico ta sali for di mentenan creativo, pero e mentenan creativo mester wordo inspira y esey ta e obhetivo di e cumbre aki”, minister Wever a bisa.

E cumbre ta conta cu e apoyo y patrocinio di diferente compania- y fundacionnan, como por ehemplo Kiwanis Club San Nicolas y otronan. Luella Croes di Departamento di Asuntonan Economico a expresa cu e idea di YES ta representa e iniciativa pa e desaroyo di empresanan, na unda nan ta bay presenta e parti di entrepreneur y tambe lo siña e participantenan con pa traha un Business Plan riba e veld di hobennan.

El a conta cu den pasado nan a dedica proyectonan na hobennan entrepreneur, unda cu nan tin e pensamento cu for di chikito caba mester educa muchanan riba e parti di entrepreneur, “pasobra algun dia cu nan lo bay studia afo, nan no mester pensa solamente den con por traha pa otro hende, sino cu nan por traha pa nan mes tambe”, Croes a menciona.

Endrah Richardson Gumbs, presidente di Kiwanis Club San Nicolas a comenta cu nan ta gradici cu e organisacion di e evento aki pa hobennan, unda nan tin experiencia caba organisando nan cumbre pa nan hobennan pero esaki ta di otro nivel. Ta p’esey nan ta gradici gobierno pa acerca Kiwanis Club San Nicolas pa di e forma ey por yuda acerca e hobennan. “Nos por a tuma nota cu hopi di nan ya caba ta entrepreneur, nan a cuminsa nan mesun empresanan, si ta online, digital, den diferente ramo y esaki ta e direccion cu nos hoben ta bayendo aden. P’esey nos ta sostene e cumbre aki, pa asina nos por yuda nos hobennan di San Nicolas, di bisindario”, el a finalisa.

Di su parti, Oliver Vieira, manager di Qredits a señala cu esaki ta algo hopi importante, cu tin mester di dje. Su persona den nomber di un compania ta wak cu tin potencial hinca den e muchanan cu ta e futuro di e isla aki. Vieira tambe a informa cu conhuntamente cu Ministerio di Asuntonan Economico, proximamente lo wordo introduci un model business academy cu por yuda no solamente e hobennan local sino adultonan tambe.

Como empresario, ta hopi importante pa e mes por adapta na e situacion y adapta su idea pa por sigura cu e ta complementa e mercado den cual e ta desea di drenta. “Tin hopi eynan pa por duna y mi ta wak cu akinan tin un infrastructura cu por sostene den e desaroyo ey tambe”, el a señala.

Igualmente minister Wever a trece dilanti cu na San Nicolas mester tuma luga diferente accionnan pa mehora infrastructura, y como ehemplo, el a informa cu nan lo cuminsa traha den e di dos piso di hulpbestuurkantoor pa modernisa e espacio aki y haci’e un infrastructura na unda hobennan por bin hunto cu un concepto di incubator, y di e forma ey nan por tin acceso na hermentnan cu ta necesario pa por bay dilanti como empresario.

Ademas el a bisa cu tin otro diferente combersacionnan tambe pa otro proyectonan pa e area aki, unda cu comunidad lo wordo informa na su debido tempo. Igualmente tambe tin proyectonan na unda cu minister Wever a indica cu mester evita cu esnan den area no tin participacion den esey. “Esey tambe ta un motibo pa haci esaki, pa habri wowo di esnan cu kier ta comerciante cu aworaki ta bay bin e catalisadornan economico pa e area y cu na momento aki bo tin cu prepara bo mes corectamente”, el a finalisa.