Manera ta conoci Minister Geoffrey Wever ta implementando e proyecto ‘Sistema Nacional di Estadistica (Nationaal Statistisch Systeem (NSS)) por medio di Centraal Bureau Statistiek Aruba (CBS) y demas stakeholders. E meta principal NSS ta pa brinda estadisticanan oficial di calidad halto cu ta na beneficio di un pueblo.
Un pueblo bon informa ta yuda profesionalnan den tur ramo eherce nan trabounan. Alabes un NSS ta un elemento esencial den bon gobernacion unda por tuma decisionnan mas obhetivamente substancia.
Recientemente Minister Geoffrey Wever a firma acuerdo di trabou cu un compania di wetgeving Hulandes pa yuda Aruba den traha e ley pa cu e NSS. E trabou aki ta andando.
Banda di e ley amplio di e NSS, otro aspecto importante den e implementacion di NSS ta e plataforma digital di data. Tin diferente trabou pa ser haci pa cu esaki. Un di e trabounan ta un audit di e diseño di e infrastructura di ICT. Conseho di minister a aproba pa un compania estableci na Aruba haci e audit aki. Ta importante pa e ICT-infrastructure ta conforme e necesidadnan di un NSS y cu ta cumpli cu rekisitonan di seguridad nacional y internacional pa cu data.
“E NSS ta un herment importante y moderno pa nos traha pa un mihor Aruba. Mi ta contento cu e progreso den implementacion di e NSS. E trabounan pa e ley di NSS ta andando y tambe trabounan pa e plataforma digital di data. Tur esakinan ta importante pa por garantisa datos di calidad y accesibel pa tur usuario di datos”.
Minister Wever a comenta.
