Awe 24 di mei 2023 Minister Geoffrey Wever a inaugura e “Aruba Office” na Holland House Colombia. Durante un ceremonia ameno cu presencia di embahador Sr. Ernst Noorman, directeur Jan-Willem van Bokhoven, presidente di Kamer van Koophandel Gavril Mansur, directora di Departamento di Asuntonan Economico Maria Dijkhoff-Pita, y e delegacion comercial di Aruba, e “Aruba Office” na Holland House a bira un hecho pa asina facilita comercio entre Aruba y Colombia.
Pa facilita comercio entre Aruba y Colombia, Minister Geoffrey Wever a sera un convenio recientemente cu Holland House na Colombia. Holland House ta un e di e Camaranan di Comercio mas grandi na Colombia. Holland House ta un e di e Camaranan di Comercio bilateral mas grandi na Colombia y di Hulanda na mundo. Holland House Colombia cu a habri na 2003 ta un inicitiava publico- priva y non profit, tin 380 miembo afiliado y ta conta cu un staff di aproximadamente 25 persona.
E convenio aki ta e continuacion di loke sector priva di Aruba a inicia cu Holland House den e ultimo añanan. Den e colaboracion inicial aki 5 compania a establece na Colombia, aproximadente 60 comerciante di Aruba a demostra un interes den e mercado di Colombia y mas di 350 comerciantenan di Colombia a demostra interes pa hasi negoshi na Aruba.
Embahada Hulandes hunto cu Holland House Colombia tin e tarea pa facilita e interesnan di islanan di Reino den nos region di Caribe. Mientras cu Embahada ta encarga cu aspectonan gubernamental, Holland House Colombia ta encarga cu aspectonan di lasonan empresarial, manera establecimento di empresa na Colombia, of viceversa.
E convenio y e cooperacion cu Holland House Colombia ta un instrumento esencial pa facilita negoshi y inversionan entre Aruba y Colombia. Esaki ta forma parti di e maneho economico pa nos companianan crece y nos consumidornan tin mas acceso na productonan na prijsnan bentahoso pa asina yuda baha e costo di bida na Aruba segun minister Geoffrey Wever. Cu presencia di entre otro Camara di Comercio y Departamento di Asuntonan Economico ta demostra un esfuerso comun pa logra e metanan estableci.
“Aruba Office” ta e presencia oficial di Aruba na Colombia cu tey pa brinda asistencia na empresarionan Arubano cu interes pa hasi negoshi cu Colombia y alabes pa duna informacion y sosten na tur pontencial inversionista y/o comerciante Colombiano cu interes den e mercado Arubano.
