A traves di un comunicado di prensa Minister di Finanzas, Economia y Sector Primario, Geoffrey Wever, a informa cu el a tene su prome reunion oficial cu Directie Financiën den su funcion como minister di Gabinete AVP-FUTURO.
E reunion aki, e comunicado ta informa, ta parti di e esfuerso pa yega na un comprension profundo di e reto, prioridad y metanan principal di finanzas publico pa Gabinete AVP-Futuro.
Durante e encuentro aki, e mandatario, y e representantenan di Directie Financiën a trata varios topico clave relaciona cu maneho di presupuesto nacional y aspectonan fiscal pa futuro. Directie Financiën tin e rol crucial di promove sostenibilidad financiero pa gobierno di Aruba.
Minister Wever a expresa su baloracion pa e trabou tecnico y dedicacion cu e ekipo ta demostra, y a subraya e importancia di un colaboracion estricto entre e ministerionan y Directie Financiën pa logra resultado concreto.
Pa loke ta trata presupuesto 2026, e mandatario a informa mediante e comunicado cu mesora a cuminsa enfoca riba e presupuesto nacional 2026, pa logra trece e cambionan necesario y encamina e proceso pa entrega e presupuesto na tempo y trata esaki den Parlamento.
“Un maneho responsabel di finanzas publico ta fundamental si nos kier crea e espacio financiero pa por inverti bek den comunidad traha riba un futuro sostenibel y prospero pa tur ciudadano,” minister Wever a destaca.
Minister Wever a informa cu lo sigui cu un serie di reunion cu otro departamento y entidadnan relevante di control den e prome simannan di su nombramento como minister di finanzas, economia y sector primario, pa sigura un enfoke integral y coordina riba e temanan economico y financiero structural cu tin impacto riba bida di e pueblo Arubiano.
