Minister di Asuntonan Economico, Comunicacion y Desaroyo Sostenibel, Geoffrey Wever y delegacion di Aruba, consistiendo di Directora di DEZHI Sra. Dijkhoff-Pita, Presidente di KvK Sr. Kemmerling y Director di ATIA Sr. Henriquez, a reuni diamars merdia cu Presidente di Surinam Sr. Chandrikapersad Santokhi compaña pa Minister di Economia, Empresaria y Innovacion di Surinam, Sra. Rishma Kuldipsingh na Paramaribo, Surinam.
Durante e reunion e delegacion di Aruba a wordo compaña pa embahador Reino Hulandes na Surinam Sr. Walter Oostelbos.
Despues cu Minister Wever y e delegacion di Aruba a reuni cu Minister di Economia di Surinam den oranan di mainta, atardi Minister Wever a reuni cu Presidente di Surinam Sr. Chandrikapersad Santokhi.
Durante e encuentro aki a combersa di diferente topiconan di con Aruba y Surinam por yuda y comparti ideanan cu otro manera riba tereno di agricultura, turismo, servicio pero tambe riba e parti economico y tambe con lo por agrega un vuelo di carga entre Aruba y Surinam cu SLM, cu ta e aerolina nacional di Surinam.
Minister Wever y Presidente Santokhi a intercambia tambe di idea con Surinam por pone terenonan disponible pa agriculturnan di Aruba pa cultiva na Surinam.
“E reunion aki tambe a bay den un ambiente hopi ameno y ta confirma cu Aruba y Surinam ta mira oportunidad den traha mas cerca di otro. Mi ta hopi contento pa wak con e delegacion di Aruba a wordo ricibi y pa sinti cu nos ta alinea”, segun Minister Wever.
