E siman aki tabatin un prome reunion entre Minister di Asuntonan Economico, Sr. Geoffrey Wever y presidente nobo di Huurcommissie, Sra. Mr. Monica Kock y secretaris nobo di Huurcommissie, Sra. mr. Marlee Lacle.
Ya pa algun tempo Minister Wever a encamina e proceso cu ta enfoca riba profesionalisa y modernisa Huurcommissie pa asina por brinda un miho servicio na comunidad. Aña pasa, un profielschets a ser estableci pa e miembronan y secretario di Huurcommissie, detayando e normanan di calidad y experticio cu cada miembro y secretario mester cumpli cu nan.
Despues di publica vacatura pa varios puesto den Huurcommissie aña pasa y pasa proceso di seleccion, awo minister Wever tabata tin e placer di por presenta un presidente nobo y un secretaris nobo.
Durante e reunion di ayera, a discuti varios topico relaciona cu mehoracionnan pa asina por agilisa e procesonan den Huurcommissie. E mehoracionnan aki ta inclui digitalisacion y optimalisacion di e procesonan necesario pa asina mehora e funcionamento di Huurcommissie, no solamente pa proteha e derechonan di e huurdonan, pero tambe pa e verhuurders.
Minister Geoffrey Wever ta mira padilanti pa un periodo di bon trabou y mehoracion, y ta desea e Presidente y e Secretaris nobo di Huurcommissie tur clase di exito y tambe ta gradici e Presidente saliente Sr. Sommer y e Secretaris saliente Sr. Raymond Boekhoudt pa e trabao importante cu nan a eherce pa Huurcommissie.
