Minister di Asuntonan Economico, Desaroyo Sostenibel y Comunicacion, Geoffrey Wever a informa di cambionan cu a haci den maneho di permiso pa negoshi, pa asina haci esaki mas eficiente y reduci e asina-yama ‘red-tape’.

Minister Wever a trece dilanti cu tur hende cu kier habri un negoshi mester di un permiso, cu ta conoci como un vestigingsvergunning, y esnan cu kier bira director di compañía mester di un directievergunning.

Durante un conferencia di prensa ultimo weekend, minister Wever a splica cu e dos permiso aki ta wordo duna door di su persona cu ta minister di Asuntonan Economico basa riba un vestigingsbeleid.

Pa hopi aña diferente comerciante, gremio comercial, entrepreneur, entre otro stakeholders den mundo comercial tabata indica cu ‘red-tape’ ta un fenomeno cu ta tranca e desaroyo di nos economia y cu eliminacion di red-tape lo tin como consecuencia cu economia por draai miho y companianan por establece nan mes mas lihe.

Pa hopi aña caba profesionalnan tabata vocifera cu mester bin cambio den e sistema con gobierno ta duna permiso y pa haci esey den un forma mas acelera.

Minister Wever a señala cu ora el a bira minister di Asuntonan Economico, el a pone como prioridad pa traha den eliminacion of reduccion di red-tape, unda e ultimo lunanan nan a traha hunto cu departamento di Asuntonan Economico y cu otro stakeholders pa revisa e rapportnan cu tabatin di local, compania internacional y tambe di e mesun gremio comercial.

“Esakinan nos a revisa, evalua y asina ey nos a bin na e revision di vestigingsbeleid. Awe despues di un aña den gobernacion contento mi ta anuncia na boso cu e vestigingsbeleid a ser modernisa, simplifica y digitalisa completamente”, minister Wever a sigura.

E meta di esaki ta pa elimina e red-tape, pa stimula pa negoshi lanta na Aruba, pa crea inversion, cuponan di trabao nobo, spin-off economico y aumento di entrada pa caha di gobierno.

E vestigingsbeleid nobo ta contene diferente cambio, pero Wever a trece dilanti e siete di mas importante, cu ta:

  • reduccion di red-tape;
  • ampliacion di digitalisacion di proceso (Joint Information Portal JIP) cu ta un data base pa comerciante;
  • ampliacion di categoria di persona cu no mester pidi un permiso mas;
  • stimula diversificacion di economia a traves di six promising sectors;
  • stimula inversion den centro di Oranjestad y San Nicolas;
  • duna posibilidad pa companianan chikito establece den nan cas (zona residencial);
  • stimula principionan di sostenibilidad.

Digitalisacion
 Minister Wever a sigura cu nan a elimina hopi rekisito y documento pa haci e proceso mas facil, mas agil pa asina e permisonan por sali mas lihe. El a indica cu antes por ehemplo, e cliente of persona cu ta aplica pa un permiso mester bay diferente caminda pa haya varios documento. Esaki ta servicionan cu e vestigingsbeleid y departamento di Asuntonan Economico ta bay ofrece na e cliente. El a indica cu no mester haci esey riba su mes mas, sino cu e departamento aki mes ta bay facilita e trabao aki pa un di un forma digital e ta yuda e comerciante y e permisonan por sali mas lihe.

E target cu nan a pone pa procesa permisonan pa centro di Oranjestad y centro di San Nicolas ta di dies dia pa keda cla, y pa otro permisonan pa negoshinan ta di dos siman.

“Cu esaki nos kier purba di mehora e servicio pa e cliente, laga e permisonan sali mas lihe y economia por cana di un forma mas acelera. Nos a desaroya un sistema di digitalisacion completo, e procesonan di permisonan di negoshi a wordo digitalisa mas ainda y aworaki e clientenan ya por entrega nan peticion digital y nan por trek tambe unda nan permisonan ta”, Minister Wever a bisa.

Accesibilidad pa departamentonan di gobierno

Na momento cu ta otorga un permiso, e clientenan ta haya un notificacion cu e permiso ta cla y nan por wak esey riba e portal digital na cual nan tin acceso. E portal digital tambe ta accesibel pa otro departamentonan den gobierno.

“Unabes cu e permiso lo wordo duna, e permiso lo wordo upload den e portal digital pa e comerciante y tur otro departamento cu tin vinculo cu negoshi tambe por drenta den e database aki. Esey ta nifica cu e cliente no mester entrega su permisonan diferente biaha na diferente instancia, e ta centralisa y tur departamento por pon’e den nan mesun sistema”, el a comenta.

E meta ta pa e persona cu ta aplica pa permiso aki no mester cana diferente caminda pa entrega e mesun documentonan.

Ademas, nan a amplia tambe e grupo di persona cu no mester pidi un permiso mas, ya cu den ley actual segun el a splica, e personanan naci na Aruba cu tin nacionalidad Hulandes no mester pidi un permiso of lanta un eenmanszaak of bira director. Eesaki ta basa riba hurisprudencia tambe ta conta pa personanan nacionalisa na Aruba.

Aworaki nan a amplia e categoria cu dos grupo di persona mas, cu ta personanan cu ta yiu di mayornan naci na Aruba, pero cu nan mes no a nace na Aruba; y tambe pa personanan no naci na Aruba, cu ta casa of tin un geregistreerd partnerschap cu un local y cu tin un verklaring van rechtswege.

Pa finalisa, manera ta poni den programa di gobernacion nan tin como finalidad desaroya e centro di Oranjestad y San Nicolas pa atrae inversionnan nobo pa lo cual nan a simplifica e proceso pa inversionistanan internacional tambe haya permiso na un forma mas facil y tambe pa desaroya e dos centro aki como centro di vivienda, economia, cultura, gastronomia cu industrianan creativo pa area di San Nicolas.

E maneho aki ta disponibel riba e website di www.deaci.aw y lo drenta na vigor dia 1 di october 2022.