Como Minister di Asuntonan Economico, Sr. Geoffrey Wever ta responsable di otorga permiso na esnan cu ta cuminsa un negoshi of kier haci cambio den e permiso di nan negoshi existente. Esaki ta hancra den ley y por haci esaki door di manda un peticion via e website di Departamento di Asuntonan Economico, Comercio y Industria (DEACI).
Den e periodo di april te cu juni 2024 a ricibi 6 diferente tipo di peticion cu un total di 610 peticion. Di e 610 peticion ricibi, 213 peticion a wordo trata y otorga, 211 peticion ta den tramite y 186 peticion no por a wordo trata pa falta di documento of pago.
Di e 213 permisonan cu a wordo otorga den e periodo April te cu juni 2024, 176 ta un negoshi nobo. Di e 176 permiso di negoshi nobo otorga, 23 tawata pa e eenmanszaak, 16 pa filial, 135 pa VBA, y 2 pa un vennoot di un VOF.
Real Estate, houdstermaaschappij, koffiehuis-restaurant-café- etc., companianan di construccion, kleinhandel den diferente articulonan manera paña, hoya y e-commerce ta e actividadnan comercial pa cual mas a otorga permiso.
“October 2022 nos a introduci e vestigingsbeleid nobo cu meta pa speed up e proceso di otorga permiso door di digitalisacion”, Minister Wever a cuminsa ta bisa, “E meta di esaki ta pa stimula e promising sectors, inversion den centro di Oranjestad y San Nicolas.”
Minister Geoffrey Wever ta gradici DEACI pa nan compromiso pa percura cu e permisonan pa negoshi wordo emiti na forma eficiente y lihe.
Pa mas informacion riba e proceso pa permiso di negoshi por bishita e website www.deaci.aw
