Minister di Asunto Economico, Comunicacion y Desaroyo Sostenibel, Geoffrey Wever, a anuncia ayera mainta durante su conferencia di prensa e introduccion di un programa di educacion financiero “Finanzas den mi Hogar”. Minister Wever a elabora ariba e contenido di e programa y e motibo pakico Gobierno di Aruba ta wak e importancia pa introduci un tipo di programa asina.
Wever a resalta cu educacion financiero ta un topico importante pa e cartera di cada ciudadano y na Aruba ainda educacion financiero como concepto no ta parti di e sistema educativo y como consecuencia hopi hende tin dificultad financiero. Como Minister di Economia e ta kere ta importante pa e consumidornan ta bon prepara, pa nan sa kico nan derechonan ta y pa nan tin conocemento financiero tambe door cu na final di dia ta nan ta e consumidornan di e productonan.
“Como Minister di Economia di un banda bo ta stimula, bo kier tin un economia fuerte, pero tambe bo kier pa tin un consumidor cu sa kico su derechonan ta, un consumidor cu ta bon proteha y ta conoce su posicion den e mercado”, Minister Wever a bisa.
Den e contexto ey Gobierno di Aruba ta haya hopi importante pa stimula e habilidad y conocemento financiero di cada ciudadano, specialmente den su rol como Minister di Economia e ta kere e formacion y e bienestar economico di cada ciudadano ta importante y Gobierno di Aruba kier duna un contribucion cu esey.
Minister a remarca cu manera ta conoci e situacion no ta fasil na Aruba, ni mundialmente, prijs di gasolin, awa y coriente ta subi, inflacion y den e contexto ey e ciudadano cada biaha ta mira cu su poder di compra ta bay atras, e ta mira cu e tin menos placa pa gasta y den e marco ey e minister ta kere ta importante pa e ciudadano tambe bira mas consciente con e ta gasta su placa, con e ta drenta den compromisonan financiero cu lo afect’e a termino largo.
“Den e contexto ey nos a dicidi di bin cu un programa di educacion financiero pa asina duna e ciudadanonan cu tin interes pa participa den esaki, e posibilidad pa haya un tipo di training cu kizas antes nan no a haya acceso na dje. Gobierno ta kere ta importante pa facilita esey”, el a indica.
Minister di Economia a presenta tambe Algun cifra cu ta ilustra pakico un programa di educacion financiero pa e ciudadanonan ta relevante y necesario.
El a referi na un rapport basa ariba un encuesta cu Banco Central a haci yama “The Financial Wellbeing of Households”, cu a indica cu 36% di e hogarnan tin preocupacion financiero. Tres di cada hogar ta gasta mas placa di locual nan ta gana y mita di e hogarnan aki ta financieramente fragil y tin debe di mas.
25% di ciudadanonan, un den cada cuater hogar, no tin un arreglo di pensioen. Menos di 2% di e hogarnan ta wordo considera financieramente fit, 16% ta financieramente stabiel, 34% ta financieramente dependiente y 20% ta financieramente perturba.
Cu e informacion, Minister Wever a enfatisa, cu e kier ilustra cu tin famianan cu ta pasa situacionnan duro y financieramente no ta bon ekipa. Cu e informacion aki nos a yega na e conclusion cu como gobierno nos tin e tarea di haci esaki pa nos ciudadanonan y pa e motibo ey nos a bin cu e programa di educacion financiero “Finanzas den mi Hogar”, el a agrega.
E programa di “Finanzas den mi Hogar” lo wordo duna den seis districto, San Nicolas, Savaneta, Santa Cruz, Paradera, Oranjestad y Noord y ta brinda posibilidad na 50 participante den cada districto pa participa den e training. E participacion ta gratis y lo toca cuater tema di finanzas.
E prome topico ta ‘mi ta efectivo den mi cas’ cu ta enfoca ariba con e ciudadano ta gasta e placa cu e tin na su disponibilidad den su mesun hogar. E segundo topico ta refleha e parti di ‘pago di debe’. Minister a subraya cu tin hopi ciudadano tin debe na diferente institutonan financiero y hopi biaha nan tin asina hopi debe cu nan no ta paga nan compromiso. E meta di e parti aki di e curso ta pa siña e ciudadano cu ora nan ta den un situacion asina nan mester acerca institutonan, mester cera areglonan di pago y evita cu e problema ta acumula.
E di tres topico ta ‘mi ta inverti den mi futuro’. El a indica cu hopi ciudadano no ta pensa ariba mañan y ta gasta tur cos awe. Esaki ta un elemento pa siña e ciudadano pensa pa mañan, pa inverti den educacion di su yiunan. Y e ultimo topico ta ‘presupuesto basico’, cu lo ta basa ariba e tema di con ta crea un presupuesto den hogar mensualmente y con e ciudadano ta aloca e entrada cu e tin.
E programa di “Finanzas den mi Hogar” lo tarda mas o menos un aña pa wordo ehecuta den completo. Cada bario ta haya e cuater topiconan aki y lo tin diferente anochi durante e periodo di un aña cu nan lo bay wordo educa ariba e tereno aki.
Cu e programa aki Gobierno di Aruba kier demostra cu e bienestar financiero di e ciudadano ta importante y cu nan ta kere den inverti back den e hendenan. “Esaki ta un paso hopi chikito, e no ta un solucion pa e problemanan financiero, pero e ta parti di un contexto mas grandi”, Minister Wever a subraya.
El a remarca tambe cu e deseo ta pa por continua den añanan binidero cu e tipo di programanan di educacion financiero manera esaki y intensifica e empeño di gobierno pa yuda e ciudadano ta miho prepara financieramente y pa tin un consumidor mas fuerte. Di e forma ey e consumidor por ta counter balance pa comercio pasobra, segun Minister a remarca, eynan mester busca un balans di loke comercio ta representa y loke e consumidor ta representa.
Pa e programa “Finanzas den mi Hogar” no a distingui den categoria. El a splica cu e programa ta habri pa 50 persona cu ta sinti nan mes yama pa participa y e setup ta un poco amplio como un prome programa. E sistema cu a wordo desaroya tin su evaluacion tambe den dje y e lo wordo evalua pa wak con por continua y diversifica den e tipo di programanan aki. “E ta un inicio y e deseo ta pa nos continua y mi ta sigur cu na dado momento nos ta bay enfoca mas den diferente categoria”, el a agrega.
El a enfatisa cu hopi studiante ta sali for di scol y no tin e experiencia con pa maneha nan finanzas y presupuesta nan entrada. Den e marco aki el a indica cu e ta kere en berdad tin diferente categoria y awendia e presion riba e cartera di tur ciudadano ta pisa, kiermen tin hopi categoria di hendenan cu por haci uso di un curso asina ki.
