Minister di infrastructura, Otmar Oduber (POR) a indica cu den proceso pa sanea atrasonan den peticion pa tereno tanto comercial como pa vivienda a bin ta descubri cu cierto desaroyadonan a haya fabor.
Minister hunto cu departamento di Infrastructura y Planificacion a reuni riba e topico di tereno comercial cu a keda otorga. Manera e mandatario encarga cu infrastructura a indica anteriormente, DIP conhuntamente cu su ministerio lo percura pa ‘tur persona cu a entrega un peticion pa un tereno di vivienda prome cu aña 2000 haya un contesta riba esaki prome cu mei venidero pasa’.
E mandatario a indica cu nan a haya un cantidad di situacion, unda cierto comerciante cu a pidi pa tereno comercial a keda faborece directamente cerca e minister kende lo a dicidi riba su mes con hopi e desaroyadonan aki lo a paga pa un tereno, entre otro.
Den proceso pa sanea e atrasonan na DIP manera e mandatario a indica anteriormente, a bin ta descubri cu e companianan aki lo a haya cooperacion di parti di e minister anterior pa exclui cierto condicionnan pa bay den erfpacht por ehempel. Segun minister a tuma contacto cu tur e companianan y desaroyadonan aki y a palabra cu nan, yegando asina leu cu sr. Oduber ta spera cu den e proximo 30 dia lo por sanea e situacion aki na DIP.
Actualmente e minister ta hibando un campaña di conscientisacion riba e aspecto di integridad pa loke ta trata otorgamento di tereno pa asina percura cu e procesonan keda transparente y duna acceso igual na un y tur a base di normanan stipula, segun minister.
