Diasabra anochi cantidad di Dominicano residencia na Aruba a atende un reunion na Cas di Cultura cu a conta entre otronan cu presencia di Minister di e Dominicanonan bibando den exterior, Licenciado Ramiro Espino. No ta e prome biaha cu Licenciado Espino ta bishita nos isla. Ya caba den otro ocasion el a sostene e tipo di reunion aki cu su paisanonan. E biaha aki e bishita di Licenciado Espino ta tuma luga den cuadro di eleccion venidero. “Boso sa cu ora mi bin Aruba bin no ta bin cu man bashi, semper mi ta trece algo pa boso bienestar”, el a declara dilanti e publico presente.
E biaha aki e no tabata un excepcion tampoco, asina el a bisa. El a menciona cu nan a bin cu e seguronan di salud y esun di repatria ora cu un Dominicano fayece den exterior. Diasabra anochi el a probecha pa anuncia un macro proyecto di vivienda, y el a bin entre otro cu sr. Freddy Lopez kende ta e arkitecto y diseñando di e Ciudad Juan Bosch un compleho residencial cu area recreativo, hospitalnan, compleho deportivo, scolnan, etc… ubica na Sto. Domingo
E eleccion lo tuma luga dia 15 di mei caminda tur Dominicano te hasta esun cu ta biba afo di nan pais lo por vota, pues esaki tambe ta conta pa esunnan estableci na Aruba. El a elogia e trabou di su representante na Aruba, sra. Crucita Mercedes y tambe e representante Consular, Sr. Alfredo Mateo Sabala ta bin realisando, ya cu nan a traha hunto y nan a logra “cosnan extraordinario pa e Dominicanonan na Aruba…”.
Ciudad Juan Bosch
Sr. Alfredo Mateo Sabala a bisa cu “realmente e palabranan ta di mas ora cu patras di nan no tin obranan concreto pa respalda nan”. El a indica cu durante e ultimo añanan nan a priminti cu lo bin cu cambionan importante pa por yuda dirigi e destino di e Dominicanonan na Aruba pa medio di nan Consulado den beneficio di e comunidad Dominicano.
P’esey nan a bin cu varios cambio pa mehora ainda mas nan servicio. Entrante awe e Consulado Dominicano lo traha no stop, kiermen nan ta bay sigui traha den oranan di merdia. Nan ta cuminsa traha fei 8’or di mainta te cu 4’or atardi.
Tambe el a elogia e proyecto Ciudad Juan Bosch, ya cu –segun sr. Sabala- ta prome biaha cu un presidente Dominicano ta bin cu un proyecto ambicioso. “E ta un proyecto ambicioso cu tin mas cu 25 mil apartamento cu ta na disposicion di tur Dominicano estableci den e diferente region di nos planeta”, el a bisa.
El a agrega cu nan a bin cu e proyecto aki pa duna oportunidad no solamente na e Dominicano bibando na Rep. Dominicana sino esunnan cu ta biba afo. El a bisa cu esunnan cu ta biba den exterior hopi biaha ta carece di oportunidad pa adkiri un vivienda den nan pais natal. Ademas e Dominicano cu ta biba afo ta aporta di un forma substancial na economia di su pais pa medio di nan divisa den forma di remesa of ayudo pa nan famianan.
Presidente PLD
Bon Dia Aruba a papia cu sra. Crucita Mercedes kende ta presidente di e PLD na Aruba y representante di minister Licenciado Espino pa loke ta trata di e Dominicanonan residencia na Aruba. El a bisa cu e presencia di e mandatario Dominicano na Aruba ta relaciona cu entrega di e seguro di salud. E ta un proyecto cu nan a introduci tres aña pasa, nan ta dos seguro un di salud (Cenaza) y otro di repatria. E seguro aki a wordo entrega na 500 Dominicano na Aruba. Tambe nan a lansa un proyecto di vivienda, esta Ciudad Juan Bosch na Republica Dominicana pa “tur Dominicano lo por obtene nan vivienda na un baho costo na su pais”, Sra. Crucita Mercedes a bisa. Tambe un di e rason di e reunion aki –segun Licenciado Crucita Mercedes- ta e echo cu nan lo a huramenta e miembronan encarga cu e campaña politico di PLD cu actualmente ta e partido di gobierno.
“Pero nos kier mas. P’esey prepara boso mes pasobra e condicion ta cu e proximo 15 di mei nos voto no ta di colornan, e voto ta biña(PLD su color politico)… Mi no kier voto di colornan, sino esun biña”, el a bisa.
Dominicano na Aruba
Rigoberto ta un mecanico profesional residencia pa mas cu 24 aña na Aruba. E hunto cu su casa tabata presente den e reunion aki caminda el a elogia e iniciativa aki cu ta estrecha mas e lasonan entre e Dominicanonan na Aruba cu nan patria natal.
“Mi ta wak cu e gobierno di presidente Medina ta traha bon organisa. Cu e iniciativa aki mi por a wak un progreso pa cu e pueblo Dominicano na Aruba”, el a bisa na Bon Dia Aruba.
Igualmente el a laga sa cu nan tin un bon perspectiva di e minister Licenciado Ramiro Espino, ya cu analisando e diferente organisacion cu nan tin “nos por mira un impulso grandi pa e pueblo Dominicano na Aruba”. E ta haya cu e principal preocupacion di e Dominicano na Aruba ta su integridad, repatria ora cu un persona ta fayece y atencion di salud.
